Sorkar laipuiin Jammu & Kashmir hung bikna a hlih hnuah firfiak chetna kaihhnawih a thleng tlem sawt niin an sawi.
Kum 2019 khan firfiaka chetna hi vawi 255 a thlen laiin kuminah chuan vawi 206 chauh a thleng niin home ministry chuan Thawhlehnia Lok Sabha inkhawmah a sawi.
BJP MP Rattan Lal Kataria zawhna chhangin Minister of State for Home Affairs Nityanand Rai chuan, “Jammu & Kashmir-ah hian August, 2019 hnu lamah venhimna dinhmunin hma a sawn a, firfiakte chetna a thlem sawt a. Nasa taka venhimna khauh taka kalpui a nih avangin ramri kân ru pawh an tlahniam hle,” a ti.
Rai chuan Article 370 hlih hma, kum 2018 khan firfiak kaihhnawiha chetna hi vawi 417 a thleng a, kum 2021-ah chuan 50% dawnin a tlahniam niin a sawi.
August 5, 2019 khan parliament-ah Jammu & Kashmir-a hman mek, Articles 370 leh 35(A) chu hlih tura pass niin sorkar laipui chuan hmasawnna a thlen tam zawk theih nan union territory pahnihah a then zui.
Rai-a chuan hmasawnna tura kalpui scheme-te sawiin, “Project-te hi prime minister’s development package 2015 kha tihlen a ni a. Ministry 15 hnuaiah project 53 kalpui mek niin heng hi Rs. Vaibelchhe 58,477 man zet niin sector hrang hrang – kawngpui, power, hriselna, zirna, tourism, lo neih leh a dang dang a ni,” a ti.
Project zinga 21 chu zawh tawh leh zawh fel thuak an ni hlawm tih a sawi bawk.
Minister hian Jammu & Kashmir-a hmasawnna a awm theih nana sorkar hmalakna zingah sumdawnna lam tihchangtlun nan Rs. Vaibelchhe 28,400 pek a nih thu leh tun hnaia Srinagar leh Sharjah inkar thlawhna thlawhtirte chu hmasawnna lian a nih thu a sawi bawk.