Union Minister Ajay Mishra-a fapa, Ashish Mishra-a mawhphurtu bera puhna thil thleng, Uttar Pradesh-a Lakhimpur Kheri-a lo neitute thihna chu a chhuitute chuan ‘ruahman lawk’ tiin an sawi.
Special Investigation Team chuan ‘tum nei sa rana phiarna awm’ niin an sawi a, fimkhur loh thil avanga thleng a ni lo tih an sawi bawk.
Minister fapa leh mi dangte hian kha thil thleng kha an tih luih angin an sawi a. A chhuituten judge hnena ziaka an thlenah mi thah tumna leh tum reng vanga mi dang tihnat tumna thubuai an ziak tel.
Ashish Mishra leh mi dang, he thubuaia inhnamhnawih ve dangte hian tualthah leh tha lo taka mi dang phiarna thubuai an awrh sa a ni.
Inthlang tura inbuatsaih mek, Uttar Pradesh-ah hian rorel lai, BJP tan leh Union Minister of State for Home Ajay Mishra-a tan chuan he thu thar hi thil lawmawm loh tak a ni a. Lo neituten nasa takin bâng tura an nawr chungin Prime Minister Narendra Modi-a cabinet-ah a la awm reng a ni.
Lakhimpur Kheri-a lo neitute kawng zawhnaa minister fapain a lirtheiin kawng zawhte hi an hnung atangin a su lui nia sawi thil thlengah hian Lakhimpur police hian FIR pahnih an ziak lut tawh.
Pakhat hi lo neitu thi zinga pakhat chhungte ziah luh niin Ashish Mishra hi a titu berah a puh a. FIR dang hi Lakhimpur-a BJP worker pakhat, Sumit Jaiswal-a hminga ziah luh niin kha thil thlen hnua lo neituten tharum an thawh zuina avanga ziak luh a ni.
Video thehdarhah chuan Jaiswal-a hi lo neitute sutu SUV pakhat atanga a tlanchhe lai hmuh a ni a. A hnuah Ashish Mishra nena a titua puh an nih avangin man a ni.
He thil thleng chungchang hi Supreme Court-ah petition lutin court hian Uttar Pradesh sorkar hi thil tam tak a zawh phah.
Thla hmasa khan Supreme Court chuan Special Investigation Team chu rang taka chhui zo turin a ti a. Team-ah hian IPS officer pathum telh belhin heng mite hi Uttar Pradesh cadre, an state pawn lama mi an ni a. Hei hi tual chhung police-in an chhuinaah awn lam emaw an neih tur vengtu tura tih a ni.
Hetih lai hian Thawhlehni khan minister hian tan ina awm mek, a fapa chu a tlawh.
October 3-a Lakhimpur Kheri-a thil thleng hi ram pumah demna thawm a ri a, a bikin lo neituten an demin minister chu bâng turin an nawr nasa hle a. A fapa man a ni mai lo pawh Uttar Pradesh-a BJP sorkarin a hum vang niin an puh.
Lakhimpur Kheri-ah hian ram puma lo neituten dan thar, farm law pathum duh lohna kawng zawh an huaihawt a, hei hi minister-in a tlawh laia tih tuma inruahman sa an ni.
Kawng an zawh lai hian an hnung lam atangin Ashish Mishra-a khalh nia an sawi SUV chuan sutin lo neitu pali leh chanchinbumi pakhat an thi a, a hnua buaina thleng zuiah mi pathum an thi leh bawk a, an zinga mi pahnih hi BJP worker an ni.
Social media-a thil thleng lai video thehdarhah chuan SUV hi chak taka tlanin an hnung lam atangin lo neitute a su phei bawrh bawrh niin a lang.
Minister fapa hi a inrawlh lo niin an sawi nasa hle a, hetih lai vela a phone awmna chhuiah erawh a bul hnaiah a awm ngei a; mahse, hei pawh hi he thil thlenna bul lawka an chhungte tlawha a kal vang niin an sawi.
Nasa taka nawrna a awm hnu leh chhuina atanga a lan dan atangin a hnuah man a ni ta tho.