- MC Lalrinthanga
Pu Zoliana Royte “Khatla Arsi” tih thupui hmanga ka tar lan hi kan sawi chian hmain sorkar hna a thawh chanchin tawi te tar lang hmasa ila, “Khatla Arsi” tih hming ka put tir ang bawk hian “Mizo arsi êng mâwi, Zoliana Royte” pawh ti ila a inhmeh êm êm bawk ang; Zoliana Royte hi lehkha thiam thei tak, an pâwl-ah a thiam thei ber zinga mi a ni zêla. Matric result a hriat hma atangin St.Paul’s school ah zirtirtu hna thawkin, a hnu ah synod high school leh K.M high school ah te a thawk chhunzawma, sorkarah hna pahnih a dila, a hmu ve ve a. Sport Deptt. a Sport & Youth Services a Physical Education Officer hna a dil chu a zawm ta zawka. He Deptt. ah hian thawk chhunzawm zêlin November. 2011 khan Director in a pension ta a ni.
Zofa sorkar hna thawk tha, a ni ang tluk hi sawi tur an vang hlein ka ring. Pu M. Lalmanzuala, Mizo IAS Chief Secretary kan neih zinga thawk reilo ber Mizoram mipui tana thawk tha ber leh eirukna pawh ti bo ti tih chanchin ka ziak angin, Pu Zoliana Royte chanchin pawh hi ziah tlak niin ka hria. Ram chhûng leh ram pâwn ah nihna pawimawh tak tak, a chelh anga tam chelh ve Mizoram sorkar hnathawk zingah awm ve tak maw? A hna chelhte chu:- 1. International level ah pahnih (2). 2. India ram pum huapin nihna pakua (9). 3. Mizoram chhûngah nihna sawmhnih leh panga (25) . 5. India aiawhin vawi sawm leh panga (15) a zin bawk.
Pu Zoliana Royte hian chawimawina chhuan awm tak pahnih a dawng:- 1. State secretary a nih laiin, silver star award 2002 ah India President APJ Abdul Kalam-a kut atangin a dawng. 2. State Chief Commissioner a nih laiin, silver elephan 2007 ah India President Pratibha Patil hnên atangin a dawng bawk.
Pu Zoliana Royte nen kan inhriat tanna chu, kum 1973 ah Hnahthial high school atangin St. Paul’s high school ah pâwl kua zir turin ka kala, St. Paul’s high school MZP branch President ah thlan ka nih avangin MZP General Headquarters-in “Thu leh hla kûtpui” Ni 1 – 6. November. 1973 a a buatsaih Tv. Vaivênga, Education minister Bangla ah ka tel ve a, high school zirlai atangin keimah chauh ka tel nghe nghe a ni. He “Thu leh hla kûtpui” ah hian Rev. Liangkhaia, Pute:- V.Hawla, DP. Thanbûka, etc. leh Prof. Siamkima, Prof. Lianhleia leh midangte nen kan inhmêlhriat tan ta nghe nghe a ni. He mi kum hian Pu Zoliana Royte hi MZP General Headquarters President a ni a, chapchar kût pawh sipai lam-mual ah Pu Hrangaia kût Pa a hmangin, ropui takin a ma hovin kan lawm bawk, kum 1973 atang hian kan in thlah tawh miah lo.
Pu Zova hi, “Engkim hria, engkim thiam” kan ti mai thin, motor khalh-te hi handiman-a tan phawt loh chuan khalh mai turah kan inring ngai lova. Pu Zoliana chuan a khalh ta mai a, hetih hun lai hian two wheeler motor-te hi Aizawl veng zawng zawnga awm kan hre kim thei vek emaw tih turin a tlêma, bullet bike a ni deuh bera hmeichhia chu sawi loh, mipa nazawng pawhin khalh en in kan en ngailo. Pu Zova hi chuan an Deptt. bike lei thar pawh a khalh thei nghal mai zu-nia, a naute chuan “thlawhna pawh a khalh thei ang” an ti hial a ni.
Khatla khawtlangah nihna pawimawh zawng zawng, a tlangval lai atangin a chelh kim vek: 1. Khatla sporting club president hmasa ber. 2. Khatla YMA Vice President leh secretary. 3. Khatla MUP president. 4. VDP president.
Kohhran lamah: 1. Khatla Presbyterian Kohhran Upa. 2. Branch KTP Leader, Secretary leh Asst. Secretary. 2. Bial KTP Secretary leh Committee member (Mission veng Pastor Bial.) 3. Bûngkâwn Pastor Bial KTP Leader. 4. Central KTP Finnance Secretary, Treasurer leh Committee member.
Synod ah: Synod education board member, Synod finance committee member, Synod hospital board, Synod endowment fund, Presbyterian Bible school committee member.
Upa Zoliana Royte Pa hi Upa Chawnga, kei chuan “Khatla Pa” tiin ka sawi thin. Khatla Kohhran dintu, Khatla vêng ti mâwitu leh neitu a ni a. Khatla a pêm lût leh In luah thar tupawh thliar lovin a thlawh chhuak thina, vêng chhûngah an tlangnêl lovang tih a hlau êm êm thin, a chanchin hi sawi tam ngai lovin “Chawnga Road” tiin khawtlang leh sorkar-in tûnhma a “Khatla vêng phei” kan tih, a hming chawia vuah a ni ta hian a hril chiang ber âwm e. Upa Chawnga tih loh ah chuan, kei chuan Upa L. Dangliana leh Pu R. Thanzauva-te kha “Khatla Pa” ni-ah ka pawm hmiah bawk. Pu Zovate unau hi, mipa pali (4), Hmeichhia pathum (3) an ni a, Pu Zova tih loh hi chu Kohhran leh khawtlangah inhmang êm êm an awm lova, hmeichhe zinga a upa ber U Zosiami erawh chu a Pa ang bawka Khatla Kohhran hmeichhe kûlpui leh khawtlangah pawh hruaitu a ni.
Upa Zoliana Royte hi, thian leh unau anga ka en a ni a, ngaihdan leh duh dan pawh sawi ve pawp pawp mi a ni a, sorkar officer tê a nih lai khan thingtlang khaw pakhatah a zina (a khaw hming chu sawilo ila) a khaw nâwtin an lo hmuak a ni âwm e. An khaw VCP chuan “Pu Zoliana thu sawi-a kan koh hmain, nuihza siam turin i ko hmasa ang u” a lo ti a ni âwm e. (Nuihza siam thiam pâwl HMANA MI AIA NUAM’ hotupa Pu H. Zoliana emaw a ti ni ngei tur a ni.). A office a ka len tumin a lo âng fiam vaka “Thil min dil reng reng, he khawho hi chu ka pe dawn lo” a ti a ni.
Khatla-in Village Council a neih term hmasa ber khan Village Council Secretary ka ni a, kan V.C.P chu Pu F. Hrangvêla Ex-M.L.A a ni. Hemi tum hian Pu Zova hi V.D.P president a ni a, Village council leh Y.M.A , M.H.I.P, V.D.P, Kohhran hrang hrang aiawh etc. committee-te chuan, zu zuar In hnih (2) chu zuar tawhlo tura kan ngen pawhin an pawisak loh avangin “An In vuak chhiat ni se” kan ti a, kan vaw chhe ta a. Zu zuar In hnih (2) te chuan, sorkar ah Pu Zoliana leh sorkar hnathawk dang mi pathum (3) te chu an hêka. Joint committee chuan an thubai, sorkar-a khawtlang aiawha hmala turin min ruat a, committee meeting kan bân hnu chuan Pu Zoliana Royte nen kan haw duna, an In kawta “ZOLIANA ROYTE, PRESIDENT V.D.P” kawng kal zawng zawngin an chhiar theih tura a tar chu, a bula fah thing pho chu la in, “Pi-vawng” ti khawpa nâ in a vaw thla ta a, heta tang hian a Pa-in Khatla V.D.P a lo din chu a bân san hlen ta niin ka hria.
An tlangval laia an hla duh êm êm “Khawngaihna mak, mâwi leh duhawm” Tlangvalte:- Vânêngmâwia T.T Tlâng, Vanlalnghâka, Mission veng, C. Lianhmingthanga, Mission vengthlang, Thlamuana, Kulikawn te’n an sak thin hi, ka mitthla ah an châm reng thin, he hla an sak thin châng tâwp ber hmang hian thu i khar rih teh ang.
“Chutah, kum sâng sâwm ral hnuin,
Ni êng mâwi takah chuan;
Fakna hun tan ang a ni ang,
Chatuana zual zêl tur.”