Assam police-in Aitlanga Mizo hmunphiah huan leh kuhva kung an tihchhiat chungchanga National Human Right Commission (NHRC)-a zualkona chu naktuka ngaihtuah tura tih ni mah se, Mizoram sorkarin report an thehlut hman dawn lo nia thudawn a ni.
June 29, 2021 khan Assam police thahnem takin Vairengte ram chhung, Aitlang luhchilhin hlo turin Mizo chhungkaw 18-te enkawl hmunphiah huan leh kuhva kung eng emaw zat kapin an tihchhiatsak a. A tuartu chhungkuate Assam sorkarah zangnadawmna dilsakin Joint Action Committee (JAC) on Inner Line Reserved Forest Demand chuan hma an la a, Delhi-a NHRC hnena an zualkona chu a ngaih pawimawh avangin thu tlingah pawmin, Assam leh Mizoram sorkarte insawifiaha report thehlut ve ve turin a ti a ni.
August 18, 2021-a JAC-in NHRC hnena complaint an thehluh hi naktuk (December 18, 2021)-ah Assam leh Mizoram sorkar insawifiahna report an thehluh ve vete Shillong-ah ngaihtuah tura tih a ni. Mahse, Mizoram sorkarin report hi an thehlut ve hman dawn ta lo niin The Zozam Times-in thu a dawng.
NHRC hnena complaint theh luhsaktu, Rosalyn L Hmar, Advocate, JAC Secretary, Information & Publicity chuan, “Complaint kan thehluh hi NHRC chuan a ngaih pawimawh avangin Assam leh Mizoram sorkar chu report thehlut ve ve turin a ti a. Mahse, kan sorkar hian report theh lut tur hian NHRC hnen atanga lehkha hmu tlai anga insawiin, report thehluh hman an inring lo niin an insawi a ni,” tiin The Zozam Times zawhna a chhang.
“Mizoram sorkar hian report a pek turte chu han buatsaih zung zung se, thehlut ve thei se a tha tur a nia. A tuartu zawk kan ni a, thahnemngai tur zawk pawh kan ni. Hetiang thil hmanhmawhthlakah pawh a tuartu ram kan vuaicha hi a pawi kan ti takzet a ni,” Rosalyn chuan a ti.
Rosalyn L Hmar chuan naktuka ngaihtuah tura report thehluh hman a nih loh pawhin, Mizoram sorkarin report thehluh hun tur pawtsei tura ngen an tum nia an hriat thu a sawi a. NHRC-in complaint an thehluh bawhzui a, ngaihtuah a nih hun tura a tihah an aiawha mi pakhat tirh a tum thu a sawi bawk.
Hetih lai hian, August 9, 2021 khan Vairengte ram chhung, Aitlanga Assam-in an chhuhsak chhungkaw 18-ten Mizoram Chief Minister Zoramthanga hmuin an harsatnate an thlen a. Aitlang hmuna an huan lo ramte an neih let theih nan hmalakpui tura ngenin memorandum an theh lut nghal bawk.
Chief minister hnena memorandum an theh luhah chuan an huan lo ramte hi kum 50 chuang an lo enkawl tawh thu te, Assam police-in an hnehchhuh tak ram zau zawng pawh tin 80 leh a chanve vel a nih thu leh kum tin Rs 20,00,000 chuang man hu thlai an thar chhuah thin thute an tar lang a ni.