Mexican filmstar leh zaithiam lar ni bawk chu a fanu kum 11 mi a nghah laia kahhlum a ni a, Morelos state-a football academy-a pawikhawihna thleng hian rampum a nghawr chhuak.
Tania Mendoza hi Cuernavaca khawpuia sporting complex pawn lamah hian nu leh pa thenkhatte nen an fate nghaka an din laiin, motorbike nen mi pahnih an lo lang thut a, a hnunga chuang zawk chuan a kap chiam mai nia hriat a ni. Pawikhawihtute hi an tlan bo nghal.
Mexico ramah hian pawikhawihna leh tharum thawhna a hluar hle a, nikuma official data-ah chuan chawhrualin nitin hmeichhia sawm vel zet thah an ni thin.
Kum 42 mi Mendoza hi 2005 khan ‘La Mera Reyna del sur’ film atangin namen lovin a lar chho a, a hnu lamah soap opera-ah te telin, hming a chher lehzual. Hemi hnu hian rimawi khawvel luhchilhin, a thih hma thleng hian album panga a tichhuak.
Kum 2010 khan an nupaa an enkawl motor silna hmunpui atangin a pasal leh thla ruka upa a fapa te nen ruk bo an ni nghe nghe. Chhuah a nih hnu-ah vauna chi hrang hrang a dawng chho zut zutin, sorkar thuneitute hnenah vawi tam a thlen.
Mendoza tual thihnaah hian mawhphurtu hriat a ni rih lova, engvanga a laka pawikhawihna hlenchhuah nge a nih chungchangah police te’n thu mum an nei thei lo a.
Chanchin buatsaih lai hian pawikhawihtu nia hriatte man chhuah an la ni lo.