South Africa-ah COVID-19 kai chu Omicron variant avangin nasa takin pung mah se thihpui leh damdawi ina awm chu hri leng thawh hmasate aiin an tlem zawk niin damdawi in thuneitute chuan an sawi.
South Africa-ah hian Nilaini khan hripui a len hnua hri kai hmuh tam ber ni a thleng a, hei hi inkai awl tak, Omicron vang a ni.
Hetiang hi an dinhmun ni mah se National Institute for Communicable Diseases (NICD)-a an hotu, Dr Michelle Groome chuan a kai an tam ngaihtuahin damdawi ina dah luh ngai an pung lo niin a sawi.
“Damdawi ina lut hi a pun chu kan pung hret hret ngei mai a; mahse, thihpui tak phei hi chu kan punna a chhe hle,” tiin thuthar lakhawmtute a kawmnaah a sawi.
NICD-a mi tho, Dr Wassila Jassat pawhin oxygen mamawh pawh ‘a hmaa kan lo tawh tawh lakah chuan tlem tak an ni’ a ti bawk.
“Damdawi ina lutte pawh an awm chhung a rei lo thei hle,” a ti.
Health Minister Joe Phaahla erawh chuan Omicron hi a thawk nep lutuk anga ngaih ngawih chu a la hun chuang lo niin a sawi thung a. Hetih rual hian vaccine chuan damlo na lutuk tur chu a veng hle niin a sawi.
“Hetiang dinhmun kan nih chhan hi vaccine kan inpek vang a ni ang,” a ti a, a bikin kum upa an pe tha chu thihpui leh na an awm loh chhana a ngaih thu a sawi.
South Africa-ah hian mipui 31% chuan invenna hi a bikimin an dawng tawh a. Kum upa, kum 60 chin ching lam phei chu 66% zetin an dawng kim tawh a. Kum upate hi natna lang chhuak nei awlsam tur an ni.
Scientist-te chuan Omicron hi eng ang chiaha hlauhawm nge a nih an la hre thei lo va; mahse, tuna an hriat theih chinah chuan vaccine pawhin ngam lo deuh tur leh Delta variant aia inkai awl tur a ni.
Hripui tuar na ber, United States-ah chuan tun hnaiah ni khata Covid-19 kai an hmuh hi a hma aiin 30% vel zetin an pung tawh a. December 1-a mi 86,000 kai hmuh kha December 14 erawh kha chuan mi 1,17,000 zet an tling.
Omicron hi November thlaa South African scientist-ten an hmuh chhuah a ni.
Hri thar hmuh a nih rual hian khawvel pumah a darh leh chiam hlauhthawnna a awm nghal a, ram tam tak chuan Africa chhim lam ram atanga an rama luh an khap nghal a South Africa erawh chuan hri an hmuh chhuah avanga fak aia anmahni tlawhpawh khap a ni chu an sawisel nasa hle.