Khai le. I nghakchhuak ta! Zoram mipuiten beiseina sang tak nena an thlir Mizo Film Award chu zanin dar 8:00 hian Vanapa Hall-ah sem a ni dawn e. Mizo film industry-a hriat hlawh ber berte an fuankhawm ang.
Engkim peih fel
Mizo Film Award 2021 atan inbuatsaihna ngawrh taka kalpui a ni a, tunah chuan engkim peih a ni tawh. Zan dar 7:00 atangin Red Carpet tan a ni ang a, Zoram hmun hrang hrang atanga kal khawm film star te an inlan ang. Zaithiam, designer leh kawng hrang hranga mi hriat hlawh ber berte an inlan dawn bawk.
Angelina & Esther Colney
Mizo Film Award hi host pahnihin an kaihruai dawn a, red carpet-ah Esther Colney a ding dawn a, tun laia host lar em em Angelina Paul a la awm cheu bawk. Angelina hi award ceremony kaihruaitu tur a ni dawn a, a che vel hmuh a chakawm tawh hle.
Designer kut chhuak
Award sem leh event lian dangah designer te an pawimawh thin a, tun tumah pawh nominee thenkhat ten designer kutchhuak an inbel dawn. Designer hriat hlawh tak tak – Tluangpuii Hmar, Escape Engmawia leh Buanga Chhangte te kutchhuak an inbel dawna ni.
Zaithiam te’n OST sa dawn
Mit leh beng titlaitu ber tur pakhat chu zaithiam ten film OST an sa tur hi a ni. Hei hian show a tihphui zual dawn. Zorema Khiangte chuan ‘Grace’ OST a sa dawn a, a hla pawh mipui hriat lar tak ‘Saltang Tawngtaina’ a ni.
Hlimhlimi’n ‘Thingtlang Tlangval’ OST ‘Thianrinawm’ a sa dawn bawk – midang zai tur pawh an awm nual.
Tlau Entertainment buatsaih Mizo Film Award 2021 hi LPS 1 leh Zonet Bawhbel-ah live a ni dawn a, YK Official YouTube channel-ah live-a pekchhuah a ni bawk ang.