- Rinfela Zadeng
Krismas hi tlangval Josefa leh nula Mari te inngaihzawnna thianghlim tak atanga intan a ni a; an nupa zinkawng hi a awlsam lo hle. Lal Isua Krista hian a lo pian dawn atang rengin a nu leh pa te a tibuaiin thil tam tak a tawh tir a, tisa leh thlarauah hlawkna tam tak an chhar belh phah nasa hle ang. Josefa leh Mari te nupa nun atangin Krismas awmze pakhat zirchhuah kan tum dawn a ni.
Inngaihzawnna thianghlim
Josefa leh Mari te hi an ‘nih’ tirhah hian Lal Isua Krista nu leh pa tur a ni tih an inhre kher bik lo ang a, an beisei ngam kher lo ang. Juda danah nu leh pa te an fapa te nupui tur an zawn sak thin a; Josefa pawh hi a nu leh pate’n a nupui tur an zawn sak a, Mari hi an thlang a ni. Heti anga an inhual tawh hi chuan inthen leh tur pawhin dan ang taka inthen a ngai tawh a ni. Mari leh Josefa te inhualna pawh hi chu ti ang chu a ni a, innei mai tawh tur an ni. An pahnih hian an invawng tlat a, chuvangin Lal Isua Krista pianna tlak a ni tih hriain vantirhkoh Gabriel-a chuan Mari hi Lal Isua Krista pai turin a thlang tih kan hmu. Krismas intanna bulpui pakhat chu inngaihzawnna thianglim hi a ni.
A nupui hual mi dang fa paiin a rai!
Josefa tan hian a nupui hual, a nupui ni tluk tawh chu a fa ni lo paia an rai mauh mai chu a na ngawt ang! Nula fel tak leh zawiawi tak, nupui atana khawtlang leh kohhran pawhin an hriatpuia an pawmpui thlap tawh Mari chu a rai no mek a ni tih Josefa hian an han hria chu ‘depression’ neihna tham a ni! Chutah Mari hi a uire tak tak a nih phei chuan lunga den hlum tur a la ni zui a; a va han buaithlak thuahhnih em! Josefa hi mipa fel tak a ni a, a nupui hual chu timualpho kher loin, a uire thu sawi kher loa bansan a tum a ni tih kan hmu (Matt 1:19). Josefa tana ngaihtuah tur a tam zia leh Mari nena an inkara chinfel tur leh a nghawngchhuah tur rapthlakzia zia hi mihring rilru atang chuan ngiahtuah ngun poh leh a hreawmin a beidawn thlak ngawt ang.
Pasal hual nei chunga mi dang fa pai
Mahni tawka nula invawng leh fimkhur, nun uluk tak mai leh pasal hual tha tak neih laia pasal hual mek te fa ni lo han pai tura lo dawnsawn ngawt mai hi Mari tan hian a harsa hle ang. Pasal hual a neih tawh avangin mi dang fa a pai a nih chuan uire a ni tawh a, lunga denhlum tur a ni bawk. A chhung te leh a chipui te a timualphoin a pasal hual Josefa pawh rilruna leh zak takin a siam dawn tih inhre reng chungin hun harsa tak a paltlang tih kan hmu a. Josefa hnenah hian Thlarau Thianghlim kaltlanga rai a nih thu hi sawi se, Josefa hian a awih ang em? An chhungkua hian an ngaidam ang em? Josefa hian engtik hunah nge a nupui hual Mari chu a uire thu a sawi ang a, lunga den hlum tura an hruai ang? Nula naupang ve tak Mari tan pawh hian ngaihtuah tur a va tam em!
Rinna leh thuawihna
Isua Krista nu leh pa nih chu kan chak viau mai thei e; mahse engkim a famkim hmaa Josefa leh Mari te dinhmun erawh hi chu a nuam dawn reng reng lo. Hmingchhiat leh lunga den hlum hmabaka an awm a, mihring tak chuan rinhlelh a awl hle ang. Mari hian ka lakah dawt a sawi nge naute pa hi a thup? Josefa hian ka fa pai dan ka sawi hi a awih tak tak ang em? An pahnih pawh hian a ruka inringhlel tawn ve ve thei dinhmunah an ding a nih kha. Chuti anga an nupa inkar buaina thuk takin a tuam mek laiin vantirhkohin thil awmzia a sawifiah a, chu chu an ringin thu an awih mai tih kan hmu. Josefa leh Mari te hian vantirhkoh thusawi chu an ring a, thu an awih a; chu chuan Krismas lo hringchhuak a ni. An chunga Pathian rorel dan tur leh a thiltum te hi ringhlel miah loa Mari leh Josefa te hian an pawm avangin nang leh kei hian Lal Isua Krista kan lo neih phah a ni. An hmalam hunah mualphona, lunga den hlum mai baka an awm theih laiin Josefa leh Mari te chuan Pathian chu an ring lui tlat a; khawvela chhungkaw vannei ber an nih phah tih vawiinah hian kan hria.
Krismas – rinna leh thuawihna
Krismas chu December ni 25 hi a ni ngawt lo a; Lal Isua rinna leh thuawihna hi Krismas chu a ni. Lal Isua thuawih lo leh ring si loa Krismas hman hian awmzia a nei lo a, hlimhlawp hun chikhat kan hmang ve mai a lo ni ang. Sual leh thil tha lo tihna atana Krismas leh a vuakvet hi kan hmang a nih ngat phei chuan kan tan hun awmze nei lo leh boralna kawng kan zawhna hun mai a lo ni ang. Mari leh Josefa te nupain Krismas kan hman theihna tura hreawmna leh harsatna tam tak paltlanga Pathian ring chung leh thuawih taka Lal Isua Krista an hring ang hian keini pawhin Lal Isua Krista ring chung leh a thawih tlat chungin Krismas hi i hmang ve ang u.