National Health Mission Employees’ Union (NEUM)-in Mizoram sorkar an thil ngiatte tihhlawhtlin a nih leh nih loh chu kum thar lamah pawh an enzuia an bawhzui zel tur thu an president, Malsawmtluanga Hauhnar chuan a sawi.
“Mizoram sorkar leh mipuiin kan duh dan te, kan duhnate an hre tawh a. Chuvangin nawrh kan kalpui mek hi tihtawp mai a tha lo maw tih hi ka mi mal ngaihdan a ni,” a ti a; nawrh titawp tura sorkarin a ngenna chu nizan khan an pawlin an ngaihtuah ho a. He chanchin buatsaih lai hian thu chiang kan hre hman lo.
Malsawmtluanga Hauhnar chuan, “Kan nuar ngam a ni tih an hre tawh a. Chutih laiin, hunpui boruak te a ni chho ta nen mi tana harsatna siam hi a hun rih lo viau. Kum thar lamah kan bawhzui zel dawn a. Kan hmalaknaten awmzia a neih loh erawh chuan kan nawr leh dawn chiang a, kan tawpsan mai mai dawn lo,” tiin The Zozam Times a hrilh.
December 18, 2021 zan khan an thil ngiatte chungchang sawihoin Health Minister Dr R Lalthangliana hoin NEUM hruaitute an inkawm a. He inkawmnaah hian an thil phut hrang hrangteah thu lawmawm lam an hriat thu sawiin, Malsawmtluanga Hauhnar chuan, “Kan thil ngiatte zingah positive tam tak kan hmu a. Regularisation-te chu meeting-ah sawi fel mai theih ni lo mah se, theihtawp chhuaha hmalakpui min tiam a. An insawi anga theihtawp an chhuah turah kan ngai,” a ti.
Malsawmtluanga Hauhnar chuan, thla bi hlawh chungchangah state finance-a tang zawng zawngte pawh an release tawh nia an hriat thu sawiin, “NHM pawisa an release vek tawh a. Tunah hian central lam atang pawhin approval kan nei tawh bawk a. Keini chuan regular taka hlawh lak theih hi kan duh a ni,” tiin, regular taka hlawh lak theih an inbeisei thu a sawi.
Health minister leh NEUM hruaitute inkawmnaah hian, regularisation chungchangte pawh sawi ho a ni a. Post awmsa hnawh khahna tura ruahmanna awmsa pawh Covid-19 pandemic avangin an duhdan anga hmalak theih ni rih loh ni mah se, health department hnuaia hna lak tur a awm leh a nih phawt chuan hriat reng an nih tur thu health minister hian a sawi a ni.
Health minister hian NEUM hnuaia thawkte MR bill leh transfer TA an neih theih dan ngaihtuahpui a tiam niin Malsawmtluanga Hauhnar chuan a sawi bawk.
Hetih lai hian, NEUM nawrhna avang hian district hospital hrang hrangah mipuite’n harsatna an tawk nia sawi a ni. District Hospital, Mamit-ah pawh damlo admit tam tak chhuah tir an nih bakah, zan duty pawh tihtlem a ni. Nu nau nei tur, zai chhuah turte pawh Aizawl lamah refer zel niin, damlo tan leh nau nei turte tan harsatna a thleng mek niin Mamit atanga thudawnna chuan a sawi a ni.