Covid-19 chi thar, darh chak tak, Omicron chu India-ah pawh a kai mi 200 an tling ta tih union health ministry chuan Thawhlehni khan a puang.
India-a hri kai hmuh tawh zinga mi 77 erawh dam tawh leh ram danga thawn chhuah an ni thung tih ministry chuan a sawi.
Maharashtra leh Delhi chu variant thar kai hmuh tam ber tawhna niin mi 54 an awm tawh a. Telangana (20), Karnataka (19), Rajasthan (18), Kerala (15) leh Gujarat (14) ten an dawt.
Ministry-in Covid-19 a chhinchhiahna tharah chuan darkar 24 liam ta chhung khan India-ah hian hri kai mi 5,326 hmuh belh leh an ni a, ni 581 hnua a hniam leh ber tum a ni.
India-ah hian hri kai mi vaibelchhe 3.48 chuang an awm tawh a. Heng zingah hian enkawl lai mi 79,097 chauh an awm tawh thung a, ni 574 hnua an tlem leh lai ber a ni.
Darkar 24 liam ta chhung khan hripui avangin mi 453 an thi leh bawk a, mi nuai 4.78 chuangin an thihpui tawh.
Omicron strain hi a hmaa mite aia inkai awl zawka ngaih a ni a. Hmuh a nih atangin mi a tiralkhel hle a, India bikah phei chuan hri leng thawh hnihna nasa tak, damdawi in leh damdawi in daih lohna nasa tak, mi tam takin an tawrh ang kha a thlen leh ang tih hlauhna a lian hle.
Delhi khawpui, thawh hnihna tuar na ber zinga mi chuan Pathianni khan hri kai mi 107 an neih belh a. Thla ruk zet hnuah mi 100 an kai leh vawi khatna a ni a, disaster management authority pawh an thukhawm nghal chung a ni.
An thutkhawm zawhah Chief Minister Arvind Kejriwal chuan mipuite chu chiai lo tur leh hri leng darh zel tur atan sorkarin ruahmanna engkim a siam tih a sawi.
Hri kai hmuh an tlem atang khan mi tam takin an hmai tuamna an hlip tih chief minister chuan a sawi a. Mi tin Covid-19 laka himna tura dan zam zawm a tul leh thu a sawi bawk.