- David Zochhuanmawia (Vida Hrahsel Saza)
December 23, 2021 zing dar 8:30 vel khan Mizoram Volleyball Association Office bul, Tuikual North aṭangin Bus-a chhuah a ni a, tluang takin Lengpui Airport kan thleng a. Dar 11:20 ah Lengpui aṭanga thlawh chhuah a ni a, tluang takin Kolkata Airport hi chawhnu dar 12:30 velah kan thleng a ni. Kal lam hi Pathian zarah kan tluang viau a. National Junior Volleyball Championship 2021 hi ni 25 – 30 December, 2021 chhunga khelh tura ruahman niin, kan hruaitute duhsaknain Team Mizoram players hruaiin, Pu H. Vanlalngura (Boys Manager) Tuikual North, Tv. Eric Lalsangliana Pautu (Boys Coach) Zemabawk, Pu Donald Lalthanmawia Khawlhring (Girls Coach) Kanan Veng, leh kei (Girls Manager) niin Team kan zu hruai ve a ni.
Kolkata Airport-ah hian Deputy Resident Commissioner, Pu Jacob-a MCS ruahmannain, Mr. Jayanta Gosh-in min lo hmuak a, Bus bawkin Burdwan hi kan pan leh nghal a ni. 100 kms vel zet kan tlan hnuah kawng kan bo zawk a, kan bo thui hmain kan tum ram kan thleng thei ta.
Volleyball Federation of India (VFI) buatsaih, National Junior Volleyball Championship 2021 hi Sri Aurobinda Stadium, Burdwan-a nghah niin, Agradoot Sangha Ground-ah pawh Court hnih an siam a, chutah chuan kan inkhel ṭhin bawk. VFI hruaitute leh Organising Committee an fakawm hle mai a. State dangah chuan thil a awlsamin, an ruahmanna a felfai ṭhin hle a ni. Mahse, Kristian tan zawng an hun ruat hi a fuh lo deuh ṭhin chu a ni.
Chaw leh chawhmeh-
Kan thlenna hmuna ei leh in buatsaihtute an fakawm hle mai a. A hunah eitur min chhawp sakin, ei hun chhung (timing) felfai tak an siam a. Coupon nen felfai takin Breakfast, Lunch, Tea & Tiffin time leh Dinner anga ṭhen hran a ni a. Breakfast-ah Rotti & Sabji emaw, Chow emaw te siamin, thingpui in tur hi a awm reng a. Lunch-ah chuan chaw leh chawhmeh tui tak, a changin Arsa/Sangha te an chhawp a, an chawhmeh chawhchawrawi mawlh kha a tui ṭhin. Tea & Tiffin time-ah hian ṭam hnem, thingpui leh a hmehte chhawpin, Dinner hi zan dar 8:30 aṭanga ei ṭan theih niin, chaw leh chawhmeh chi hrang hrang bakah, Lassi tui tak te ei ṭhin a ni bawk.
Practice-
Kan kal chhan ber Volleyball khel tura kal kan ni bawk a, kan thlen tuk December 24, 2021 breakfast ei zawhah Boys Team-in practice na hun ṭha tak an nei a. Girls team te’n tlailam hun an chang thung. 24th Dec, 2021 zan dar 7:00 khan Manager’s Meeting neih a ni a, kan hriat tur thil pawimawh hrang hrang sawiin, darkar chanve velah Meeting an kaihruai zo vek bawk a, ruahmanna fel tak kara meeting kan nei kha an entawn tlak hle a ni.
Krismas ni-
December 25, 2021 Krismas ni tak khan zing dar 9:30 aṭangin inkhelh ṭan nghal a ni a. Hemi ni hian Boys & Girls te’n match hnih ve ve kan nei a. Zanlai dar 12 velah, khaw vâwt tak karah kan naute an la inkhel lauh lauh a ni. Kan thinlungah erawh Lal Isua Krista a piang nawn fo a, kan chet phungin Pathian a chawimawh theihna atan kan infuih nasa hle. Pool pali ve veah ṭhen kan ni a, Boys team hi Pool B ah an awm a. Girls Team erawh pool D ah awmin, Team chhuak zawng zawng State hi Boys 28 leh Girls 26 an ni a, team tel an ṭhahnem hle a ni.
Mizoram Record-
Team Mizoram Boys hian Pool match 6 neiin, vawi 5 an chak a, Jharkhand, Tripura, Punjab, Himachal Pradesh leh Assam an hneh a, vawi 1 chak loin Tamil Nadu an hneh lo a ni. Mahse, Quarter final kan lut a, Pool leader erawh kan ni pha ta lo. Kan hriat theih chinah National Junior Volleyball Championship-a mizote thlen san ber ṭum niin, Quarter Final-a kan hneh loh Karnataka leh Pool match-a kan hneh loh Tamil Nadu te’n final an lut zui a ni. Game khelh fuh loh ṭum ni lo se chuan Final lut thei niin kan inhria a. Mahse, Pathianin kan tana ṭha tawk tura ro min rel sak erawh kan pawm thiam hle thung a ni.
Girls lam hian Pool Match 6 tho neiin, vawi 3 an chak a, Uttarkhand, Bihar leh Manipur an hneh a ni. Pool match-ah vawi 3 chak lovin, Chhattishgarh, Karnataka leh Rajasthan hneh lovin Quarter Final an lut zo ve ta lo a ni.
A hunah a thleng; A va ropui êm!
Girls Team 5th Match khelh laiin Captain, Zonunmawii chuan harsatna tawkin, a lung lam a buai ta tlat mai a. Sharanya Hospital-ah tlanpui nghal niin, ICU-ah dah luh a ni ta mai a. Team hruaitute kan chiaiin, kan rilru a zamin a buai ru hle mai. Mahse, a hun tea rah ṭhin Pathian a lo lang a, kan harsatna te min rawn chhawk zangkhai sak a, Zonuni pawh zanlaiah rawn harhin, a tukah discharge theih kan ni leh ta mai a. Chumi atana mi ṭangkai tak Pastor Missionary Pu Daduha leh Pu Hruaia te’n theihtawpa min buaipuiin, an hun an seng nasa hle a, an chungah kan lawm tak zet a ni. Tin, Aizawl aṭanga min thlamuantu, Mizoram Volleyball Association hruaitute ka fak lo thei lo. A huntea rah ṭhin, sum leh pai a ni emaw, an thiltihtheihna hmanga kar hla tak aṭanga min rawn uap theite kha aw…! Ka sawi sêng lo e.
Haw kawngah-
Ni 30.12.2021 (Ningani) kan haw dawnah pawh Pastor Missionary Pu Daduha bawkin min buaipui a. Zing dar 5-ah kan riahna hmun rawn thlengin; Bus min biak lawk sak vek a, harsatna êm êm nei lovin, Kolkata Airport kan rawn thleng leh thei ta a ni.
Kolkata Airport-ah kan in Check-In a, kan la tluang viau mai. Kan nau Damlo, Zonuni erawh a taksa chak lo a chhuak leh tlat mai. Mahse, Pathian bawk kan hmachhuan a, rilru ṭawngṭaina nen Pathian kan ko vek hlawmin ka hria. Harsatna nei chung chuan Doctor-in, Thlawhna chuan a phal ve ta tlat lo mai. Sir Donald & Sir Eric-a ten Airport-ah an awm pui a, a tukah a dinhmun azirin, in thlawk haw thei ang tiin, Mizoram House lam an pan a ngai leh ta. A tuk ni 31.12.2021 (Zirtawpni) ah pawh rawn haw thei lovin, Kumthar ni 01.01.2022 (Inrinni) ah an lo haw thei chauh a ni.
Haw kawng Part-2
Kan ṭhiante pathum hnutchhiahin, rilru nuam lo tak chungin midang zawng chuan Silchar Airport pan turin thlawhnaah kan chuang a, thlawhnaa kan chuan tawh hnua an thil puan han hriatte kha a va hrehawm êm! A thui lohna atan- Silchar Airport kan thleng a. Kan Luggage kan lo chang ṭhap a, Player pathum leh ka Luggage a tel ve ta tlat lo mai. Mahse, Group-a in check-in kan nih avangin kan Luggage-ah thlap thlap kan hming an lo bel loh vang a lo ni.
Silchar aṭanga kan hawna tur hian Pu Zawma, Silchar Synod Missionary te chuan Bus min lo tih fel sakin, Airport sirah min lo hmuak a. Kan player pakhat Luggage thleng ve ta lo pakhat, a tuka Silchar Airport-a an tih thlen leh si pawh min lo buaipuiin, Aizawlah an rawn thawn a, an felin, phai lama kan Missionary awmte hi mizote tan hian an va ṭangkaiin, an va thlamuanpui awm tak êm! Bus-in Aizawl panin tlai 3:30 velah Silchar aṭangin kan haw a, kawng lakah chaw te eiin, zanlaiah Aizawl, Mizoram kan thleng thei hram e.
Aizawlah camp leh a ngai-
Kan players District danga mite hawna tur lirthei a awm tawh lo a. Mahni inluma Kumthar hmang ve thei lovin, MVA Office, Tuikual North-ah an lut leh a, Volleyball avanga an chhungte nen, hlim taka kumthar lawm thei loa an awm te hi an lainatawm ngawt mai. Kan ṭhiante pathum pawh ni 01.01.2022 (Inrinni) ah Lengpui Airport-ah rawn ṭumin, dam takin Aizawl chu kan thleng kim a, Luggage la thleng lo te, mahni khaw lama hawna la nei lo ṭhenkhat erawh an lainatawm hle a ni.
A tlipna-
Mihring hi kan duhdan ang ṭheuhin awm ta vek ila, ṭawngthuchhe loah thi hma tak emaw, Pathian ngaihsak miah loa awmte hi kan va ṭhahnem dawn tak êm! Kan Lalpa Pathian, a huntea rah ṭhin kan nei hi Kristian-te vanneihna a ni a, mihring tana a ruahmanna hi a changin khirh angin lang mah se, a hmel mawi min hmuh tirtu a lo ni fo zawk a. Kan fel lo chung pawha, kan sual chung chunga a lam kan hawi tlat a, amaha rinna kan nghah tlat hi a va pawimawh tak êm! Kan phur zawh loh khawp harsatna hi Pathianin kan chungah a thlen tir phal lo ni berin ka hria. Hun khirh tak kan tawn karah hun hlimawm fê fê pawh kan tawng ṭeuh a. Chu lam erawh ka thai lang ta lo mai e. Mizoram aiawha National Junior Volleyball khel tura zin min support-tu, kan chhungte ṭheuh leh, Mizoram mipui min lo ṭawngṭaipuitu zawng zawngte chungah kan lawm em em a, in zavaiin ‘KUMTHAR CHIBAI’ kan buk a che u.