Kum kalta 2021 chhung khan Excise & Narcotics department (END)-in Mamit district-ah thubuai 314 an ziaklut a, a hma kum (2020) aiin thubuai ziahluh 21-in a tam. Nikum chhunga zu leh ruihhlo chi hrang hrang leh a kaihhnawih an man hlut zawng Rs. 1,11,300 a ni.
END, Mamit district-in kum kalta chhunga thubuai 314 an ziahluh kaihhnawihah mi 314 an man a, kum 2021 chhung khan Rakzu litre 1546 manin, a hma kum (2020)-a litre 1343 an man aiin litre 203-in a tam zawk a. Zu bilh lai pawh kum 2020-ah tin 1068 an man laiin, nikum khan tin 1854 an man a, zu sakna bungbel 222 manin, dawidim kg 11 an man bawk.
Kum lianta chhung khan END, Mamit district hian sap zu um puitling um 46 leh a chanve um 24 an man a. Kum 2020-ah um puitling 11 manin, a chanve um man an nei lo thung a. Nikum chhung khan Can beer (500 ml) can 28 an man a, a hma kum 2020-ah man an nei lo.
Nikum chhung khan Heroin gram 424.58 an man a, a hma kum (2020)-ah gram 47.31 an man. Ganja kg 4.71 an man a, a hma kum (2020)-ah gram 0.833 an man tawh bawk.
Codeine 807 manin, a hma kum (2020)-ah 432 an man a, Lorazepam/Diazepam mum 3075 manin, a hma kumah mum 2054 an man a. Zu leh ruihhlo chi hrang hrang an man kaihhnawihah motor 8 manin, a hma kumah 3 an man a, two wheeler 10 manin a hma kumah 14 an man thung.
END, Mamit district hotute chuan Krismas leh kumthar vuakvetah harsatna liantham an tawk lo niin an sawi a. Dan bawhchhiatna liantham pawh thleng a awm lo nia an hriat thu leh lawmawm an tih thu an sawi.
Kum liamta chhung khan hri leng karah ngawrh lehzualin zu leh ruihhlo do kawngah hma an la tih END, Mamit district hotute chuan sawiin, Mamit khawpui chhung bakah district chhung hmun kilkhawr ber berah te pawh an tlawh kual thin thu an sawi a. Zu leh ruihhlo do kawngah Mamit khawpui chhung leh district chhunga khaw hrang hranga YMA, JAC, MHIP leh tlawmngai pawl dang te puihna an dawn that thu leh lawmawm an tih thu an sawi bawk.