Indian police chuan an thlalak pho chhuaka Muslim hmeichhe 100 chuang zawrh chungchangah mi pathum an man.
Heng mite hi kum 21 mi mipa pahnih leh hmeichhia kum 18 mi an ni a, thu zawh fiah mek an ni.
India sumdawnna khawpui, Mumbai-a police-te chuan mi dang man belh an awm ngei an ring.
Web platform pakhat, GitHub atanga tihchhuah app pakhatah hmeichhiate zawrh an nih avanga duh lohna leh demna nasa tak a awm hnuah tihtawp a ni mek.
“Tu nge app siamtu leh engvanga ti nge tih sawi nan chuan a la hma deuh,” tiin Mumbai Police Commissioner Hemant Nagrale chuan a sawi.
Mi pathum an man tawhte an puhna pawh hi puanzar a la ni lo.
Thawhlehni khan Mumbai police hian Bangalore-a engineering zirlai, Vishal Kumar leh Uttarakhand-ah Shweta Singh an man a. Nilaini tuk khan zirlai tho, Mayank Rawat chu Uttarakhand-ah an man leh bawk.
“Mi dang tlem thu zawh an ni bawk a. A intanna tak kan chhui zui zel ang,” tiin Maharashtra Minister of State for Home Satej Patel chuan BBC a hrilh.
Bulli Bai app an tihah hian Muslim chanchinbumi leh activist langsar tak takte pawh an phalna la hmasa lovin an thlalak pho chhuakin a lema lilam an ni.
Tun tum hi Muslim hmeichhiate online-a a lema lilam an nih vawi hnihna a ni a. Nikum July khan website pakhat, ‘Sulli Deals’ tihah Muslim hmeichhia 80 chuangte thlalak dahin ‘deals of the day’ tiin an zuar a ni.
Heng thil pahnihah hian zawrh tak tak an ni lo va; mahse, Muslim hmeichhiate deusawhna leh tihnawmnahna atana an tih a ni.
Sulli deals case pawh hi police-in chhuiin man an la awm lo thung.
Bulli Bai app thawm a rik hnuah hian Sulli deals hmanga beih lo tawk tawh, poet Nabiya Khan chuan Delhi Police hnenah kum 2021 khan amah an beihna avangin complaint a thehlut a, tun thlengin engmah chet chhuahna an nei lo tih a sawi a. Bulli Bai app-ah hi chuan tihbuai a ni ve ta lo thung.
Police chuan state pathumah Bulli Bai app behchhana complaint lutte chu an chhui zui mek.
“Kan chhuina hi a bul kan tan chauh a ni a, Bulli Bai leh Sulli Deals hi an inzawm em tih pawh kan la hre lo,” tiin Nagrale chuan a sawi.
Information & Technology Minister Ashwini Vaishnaw chuan Inrinni khan GitHub hian app-a thlalakte dah (upload)-tu chu an dan (block) thu leh police-in cyber agency-te nen an chhui zui mek tih a sawi.
Shiv Sena party MP Priyanka Chaturvedi chuan, “Block bakah hian thil dik lo tia hetiang site siamtute hrem hi a pawimawh a ni,” a ti.
ANI news agency hnenah Chaturvedi-i chuan app thar siam a nih chhan hi Sulli deals siamtute hrem an nih loh vang niin a sawi a. Sulli deals app a lar chhuah lai, July, 2021 khan Vaishnav hnenah hma la tura a ngenna lehkha a thawn thu sawiin a lehkhathawn pawh a pho chhuak bawk.
GitHub thupuangtu chuan he thil titu hi a account an tihtawpsak thu leh hetiang thil tih hi an policy kalh a nih thu an sawi.
Bulli Bai app-ah hian Bollywood lemchang thiam leh pitar kum 65 mite pawh an lang a. A lema lilamna awm hian mi tam tak mak tih a hlawh a, mi tam tak a tithinrim bawk a. Screenshot-in social media-ah nasa taka thehdarh a ni.
2018 Amnesty International report-ah chuan India-a online-a hmeichhia tihduhdahna tuar nasa ber hi thil thleng hrang hranga tha leh aw thawh nasa an ni thin tih an sawi a. Hnam leh sakhaw tlem zawk tana beitu hmeichhiate pawhin beih an tawh nasat phah hle.
India-ah hian Hindu sakhaw la run pawl tak, BJP-in ro an rel hnuah Muslim hmeichhiate tihnawmnahna ang chi hi a tam zual niin an sawi.