HMEICHHE HUANG
Naupai thila thubelhchian dawl lo – 5
Thiamna changkang leh damdawi lama hmasawnna chuan tunlai huna hmeichhiate naupaina kawngah awlsamna, hahdamna leh remchanna nasa tak a thlen mek lai hian ngaihdan hlui leh belhchian dawl lo, zel din thu te pawh a la tam ve reng tho. Heti ang hian naupai kaihhnawiha thu belhchian dawl lo te sawi-fiah dawn teh ang:
Phuahchawp: I dul/pum len dan leh lan dan azirin naute hi hmeichhia nge mipa nge a hriat theih. Mipa pai te dul hi a fual deuh a, hmeichhia pai te rawh a chhing thung
Thudik: Naupai laia i dul/pum lan dan hi i dul/pum size original khan thui takin a hril dawn a, thau (fat) tam dan leh insem rual dan te pawhin awmzia a nei hle ang. Tin, dul tharui chak dan te, nau i lo pai tawh zat te bakah nausen awmdan azir te pawhin a danglam thei tih hriat tur.
Phuahchawp: I hmel lan/en dan atangin naute hi mipa nge hmeichhia a hriat theih.. a éng phat phat a nih chuan hmei-chhia a ni ang a, a nung sar lo a nih chuan mipa i hring ngei ang
Thudik: A tlangpuiin hmeichhei tam zawk hi nau an pai atanga thla ruk velah hian an hmai a éng sar tawh mai thin a, a chhan berah chuan a tir lam thla thum chhunga insawiselna neuh neuhin a kiansan tan tâk vang a ni. Nu ber chaw ei a tui tan a, thisen kal velin hma a sawn lehzual a, dam tha tawha inhriatna lo awmin, mipa leh hmeichhia neih dan tur tehna anga hman erawh a dik lo tawp a ni.
Phuahchawp: Heartburn (âwm thip/sa deuh huam) hian naute sam a titam dawn
Thudik: Heti anga insawiselna hi naupai lai hian thil awm thin pangngai tak a ni a, a chhan chu Oesophagitis reflux vang a ni deuh ber a, chawi pai \awihna lama acid awmin chaw dâwt chhoa a rawn letlet vang a ni. Acid a awm thin avangin heartburn hi a awm thin.
Phuahchawp: Naupai laia sex hman hian nauvei a tiziaawm thei
Thudik: Naupai laia sex hman hi nu berin insawi-selna a neih loh chuan a him lohna engmah a awm lo. Nu thenkhat chu an hrin dawn hnaih lam thleng pawhin nupa nun an hmang thin a, insawiselna leh nawmsam lohna a awm loh chuan a him hle a ni. Chhula nausen hi mocous plug chhah takin a tuam tlat avangin pawi thlen tur ang zawnga sawi leh ngaih te thleng hian a dik lo hul hual.
Phuahchawp: Nau neih dan hi inthlahchhawn thil a ni
Thudik: Nau i neih dan (a pangngai emaw zai-chhuah) hi inthlahchhawnna nen inzawmna pakhatmah a nei lo. Nau i lo neih tawh zat atang te, nausen awmdan (position) te bakah Nu ber kumkuruh invuah dan leh inkau dan azir zawk a ni. Ngaihtuah buai suh!