Meghalaya Chief Minister Conrad K Sangma-a’n an state-ah tun thlenga Omicron kai an la awm loh avanga a lawmawm thu a sawi tuk chiah, Thawhlehni khan Covid-19 zinga inkai awlsam tak hi mi pangain an kai tih hmuh chhuah a ni.
Omicron kaite hi hmeichhia pali leh mipa an ni a, Shillong leh Ri-Bhoi district-a mite an ni a. Meghalaya-a health services director Aman War chuan mi pathum hi Shillong-a mite an nih thu leh pahnih hi Saiden khua, Ri-Bhoi district-a mite an nih thu a sawi.
An vai hian natna lang chhuak an nei lem lo tih an state-a damdawi lam hotupa chuan a sawi a. Mi pali hi damdawi inah awmin pakhat hi Assam lam mi a nih avangin Shillong a chhuahsan tawh tih a sawi bawk.
“Kan inbuatsaih nasa a. Covid-19 dinhmun hi kan thlirin kan ngaichang a, inring reng a. Kan kal dan ngaia kalin kan invenna kan dah dawn lo va, hei hi tun thlenga kan la thunun theih chhan pawh a ni,” tiin War chuan a sawi a. “Tute pawh sorkar thawhpuia dan zam zawm tur te, invenna kim lova lakte ti lo turin ka ngen a ni,” a ti.
Meghalaya-a health principal secretary Sampath Kumar pawhin, “Rang takin Omicron a ni tih kan finfiah a, state tlem azawng chauhvin anmahni pualin genome sequencing tihna an nei a, keini pawhin Shillong-a Pasteur Molecular Lab-ah kan ti thei a, hei hian rang taka hmuhnaah min pui a ni,” a ti.
Meghalaya hi MinION-Oxford Nanopore technology, Next Generation Sequencing (NGS) an tih bawk hmangin eng hri nge tih an hre thei bawk.
Assam-ah pawh Nilaini khan Omicron variant kai hi mi pahnih hmuh an ni bawk a. Heng mite hi Hojai leh Sonapur-a mite an ni.
Hojai-a hmuh chhuah hi Saudi Arabia atanga haw a ni a. Health department kaihhruaina hnuaiah enkawl zui mek a ni.
Assam-a Omicron kai hmuh hmasak ber hi Kamrup Metro district-a Sonapur-a mi a ni thung.
Mipa naupang kum 13 mi niin a nu leh pate nen Sonapur-ah hian mi in luahin an khawsa a. An chhungkua hi hun rei tak Mumbai-a cheng tawh niin tun hnaiah an haw a. An fapain hri a kai tih hmuh a nih hma hian Shillong an lo tlawh tawh a ni.