- Debbie Rinawmi
Kan Zoram hi thlirin han hawi vel ila, ngaihtuahna thawl tak tan lo chuan lung a awi lovin rilru natna tur tam tak a awm a ni. Chhiatna pawh hian mak tih a hlawh zo tawh lo va, thil thleng pakhat hian mipui thinlungah hun rei a nei lo. Tun hnaiah pawh hian thil thleng zahthlak leh runthlak a tam hle a, mak pawh kan ti seng lo chu a nih hi. Kan hmun pawimawh kan venhim zawh loh dan leh a pawi dan te, Health department “essential service” a tel a nih avanga nawrh khap a nih laia (the Mizoram Essential Services Maintenance Act, 1990 (Act No. 15 of 1990) sawrkarin hlawh an batsak khap a ni si lo te, inkhawmnaa SOP khauh taka zawm beisei te bawk hian award sem leh pawn lama mask vuah pawh kan inthlahdah dan te hi tar lan tum a ni hran lo va, chutiang zawng zawng phena kan ngaihtuahna, duhzawng leh ngaih pawimawh zawng hi a pawimawh zawk chu a ni.
MIN THLIR TU TE KAN HMIN EM?
Zawhna pawimawh tak a va’n ni em! Chhung lamah chuan kan inngai ropui a, tha kan in ti a, kan inchhuang hle mai. Tlawmngai ber emaw inti awm takin kan tawng chapo a, kan bul vela hnam dang te aia hawihhawmah kan inngai a. Kan tlang leh ram te hi a mawi, mahse kan chhuan viau lai hian khualzin (tourists) an va tlem si em! Mawi min tihpui vak lo nge ni a mipuite hian kan hip vak lo zawk ni ang? Kan ram zim teah hian hnathawhna avang leh zirna avangin hnam dang awm an thahnem ve ta hle mai. Heng te hian Kristian ramah hian chawhmeh a leta toa lei tir te, taxi chuan man to uchuak te leh bus-ah te zah lo taka cheibawl an hlawh fo mai. Thu hrilin kan au nasat tehlul nen, social media lamah kan infak nasat nen, kan nun hian khualzin a hnawt tiau a ni thei mai lo maw? Tupawhin thu tha tak tak sawiin ziak thei mah ila, chhungrilah dikna kan ngainat tak tak si loh chuan tun aia sang thlenna hi a awm ang em le aw? Non-Mizo Christian Fellowship-ah te pawh kal na viau thin mah ila, nitin nuna kan hmuhsita nunin Chanchin Tha a hril si loh chuan engtikah nge kan hmin theih ang?
DIKNA A FAM TA EM NI?
Kalphung (system) hi a pawimawh hle a, a rual leh tlukpuia pawimawh chu a kenkawh lam hna hi a ni awm e. Covid-19 chungchangah pawh dan zawm tur a awm a. Chu dan chu a la awm reng laiin inkhawmnaah te chuan kan duh fir em em a; chutih laiin a tel lo va kan awm theih loh pawh ni lo function hrang hrangah te chuan zawm a hlawh tawh lem lo va, inhremna emaw inchawitir pawh a awm hek lo. Kan ram hruaitute thusawi nuihzat khawpin kan ring tawh lo va; mipuite pawhin kan theih chinah kan lo rinawm lo ve bawk a. Zirlaiin a entawn a, Delhi-a online class te chu ram pawn atanga chhimtu nei khawpin a tha a, naupang pawhin an hlawkpui a, keiniah chuan Open Book Exam (bu en chunga exam) ah kan chhuah leh mai a. Sumdawnnaah kan dik lo va, contract hnaah pawh ei tu an thahnem lutuk a, kan kawng te pawh an chhia a nih hi. Israel te hi kan ngaisangin an khawtlang inrelbawlna thlengin kan entawn bawk a, an rinawmna te khu entawn a tha hle awm e. Sumdawnna lamah pawh an hlawhtling ngang mai, khawvel mi hausa billionaire za zela 11 hi Juda mi an ni, a rinawm vang a nih a rinhlelhawm hauh lo. Australian TV show pakhat chuan eng ang takin nge Israel te hi an rinawm tih hriat nan social experiment an huaihawt a. Chutah chuan mi pakhat (lemchang tu) hi mitdel lemah changin dollar 100 an ken tir a, mi lo kal pel tu te chu pawisa thleng nawi a lo dil a. Tam tak chuan vannei inti takin pawisa an laksak a, a hmu lo tak tak emaw tiin. Israel mi te erawh chuan mitdel hnenah chuan a pawisa ken zat chu an hrilh hlawm a ni. Hei hian an rinawmna nasa takin a ti lang a ni.
Mizo te nunah hian dik lohna leh hriatthiamna hi hrut rual chang a awm em aw a tih theih a. Dik lohna a awm pawhin kan sakhuana behchhanin ngaihdamna leh inhriatthiamna hmachhuan a ni a, sual vulh lenna a nihna lai a awm. Amaherawhchu, Kristian sakhua kan sawi dawn a nih chuan Isua khan leia a nun a hman lai pawh khan dik lohna kha a haw khawp mai. Dikna ngaina turin min zirtir zawk a ni.
THU LEH HLA HI MIMAL LEH HNAM DARTHLALANG A NI
Mihring nunah hian thu leh hla pawimawh lohna lai reng reng a awm lo a tih theih awm e. Thu kan chhiar duhzawng leh hla kan ngaihthlak duhzawng hian kan veizawng a hril a. Thuziak tu kan pun hnu (social media zarah) phei hi chuan kan tawngkam chelek duh danah kan mizia thui tak a lang awm e. Mimal tinin chhungkua a siam a, chhungkuain khawtlang a siam bawk a. Chumi a nih avang chuan mimal te hi hnam darthlalang an nih theihna lai a awm a ni. Kan nunah hian chhungril a pawimawh hle a, chhungril a dam loh chuan pawn lam taksa hrisel tak a neih theih loh. V. Thangzama hla ‘Tho la, ding ta che’ te hi Mizoram rambuai puala a phuah ni mah se, ‘heti kauva i nat le’ tih lai te hi dikna kan ngainat lohna te nen hian a inhmeh em em a, ‘tunah hian i kal ang u’ a’n tih te hian heng thil dik lo zawng zawng kalsan tura sawmna te pawh a ang ve tho mai. He hla ina min ngen ang ngei hian kan hnam anga kan hliam te a dam theih nan Zofate harh ila, hma lam pan turin i ding ang u.