Aizawl: Tourism Minister Robert Romawia Royte-in tourism tihhmasawnna tura hmachhawp langsar zualte sawiin, Vantawng khawhthla chu Northeast Mega Tourism hnuaia tihhmasawn tura thlan a nih thu a sawi.
Thenzawl Wellness Centre a hawnnaah nimin khan he thu hi minister chuan a sawi a. Thenzawlah tourist auditorium pawh hawn theiha peih fel a nih tawh thu a sawi.
Tourism minister chuan hri leng boruak a ziaawm chuan February thlaah tourism ministry bultumin Thenzawlah golf tournament buatsaih tum a nih thu a sawi a. Reiek tlang thuam thatna tura DoNER fund Rs. nuai 560 hmuh a nih thu sawiin, Beraw Tlang resort tihchangtlunna tur special assistance to state for infrastructure development atangin Rs. nuai 600 hmuh a nih thu a sawi.
15th Finance Commission hnuaiah Mizoram tourism tihhmasawnna tur Rs. vbc 200 dah a nih thu pawh tourism minister chuan sawiin, “Hri leng avangin kan beisei ang zat kan hmu lo mai thei thung,” a ti a. Khamrang Village Based Eco-tourism atan DoNER atangin Rs. nuai 800 pawm a nih tawh thu leh external aided fund atanga Rs. vbc 1,000 an beisei mek thu a sawi bawk.
Thenzawl Wellness Centre-ah spa, massage room leh cafeteria bakah riahchilh duh tan eco-log hut pariat a awm a. A sak nan hian Siberian Pine Wood vek hman niin, Thenzawl Golf Resort nena hman dun theih tura ruahman a ni.
Tourism ministry scheme – Integrated Development of New Eco-tourism Destination under Swadesh Darshan – North East Circuit hnuaia sak niin, wellness centre atan bika sum ruahman, Rs. nuai 1,037.69 a ni a, Edufice Infraservices Pvt. Ltd-in January, 2019-ah a sak hna tanin, hri leng avangin a hawn hun tum hnih sawn hlat a ni tih sorkar thuchhuahin a tar lang bawk.