Lungleia Govt. High School-ah nimin atang khan Lunglei district-a kum 15-18 inkar te hnenah COVID19 vaccine pek tan a ni a. Hri danna pek beihpui hi district bawrhsap Kulothungan-a’n a hawng a ni.
Lunglei bawrhsap chuan tunhnaiah India ram hmun hrang hrangah COVID19 hri kai nasa takin a pung chho leh mek tih sawiin, Lunglei district-ah pawh hri kai hmuhchhuah a pung chak leh hle tih a sawi a. Lunglei district chu COVID19 vaccine pekchhuahah Mizorama titha berte zing ami niin first dose 94.9% leh 2nd dose 85.1% pekchhuah tawh a nih thu a sawi.
Vaccine pek kawngah H&FW department thawktute bakah DLTF leh VLTF member te thahnemngaihna lawmawm a tih thu bawrhsap chuan a sawi a. Kum 15-18 inkar te pawhin kim taka hri danna an lak theih na tura hma la theuh tura chahin, Lunglei district mi vaccine la thei zawng zawngte chu vaccine la ngei turin a chah bawk.
Lunglei district immunisation officer Dr. Lalrinthangi’n kum 15-18 inkar te chu sorkar laipui ruahmanna siam angin Covaxin pek an nih thu sawiin, Covaxin 1st dose pek ni atanga ni 28 hnuah 2nd dose pek leh an nih tur thu a sawi a. H&FW department chhinchhiah danin Lunglei district huamchhungah vaccine la thei target population 9532 a nih thu a sawi.
H&FW hotute sawi danin Lunglei district-a COVID19 vaccine dose la kim tawh healthcare worker, frontline worker leh kum 60 chunglam natna benvawn nei te tan January ni 10, 2022 atangin Covid vaccine booster dose pekchhuah tum a ni.