Inhnialna leh thu inchuhna awm ve reng karah STRYPER zaipu Michael Sweet-a’n an hla thu te hian Isua Krista lam hawi mah se, engtik lai maha Kristian band an nih ngai loh thu a sawichiang ta.
Mizo thalai tam takte ngaihsan ni mek STRYPER band hotupa hian FOZZY puipa leh wrestling superstar ni bawk Chris Jericho-a ‘Talk Is Jericho’-ah, “Tunhnai mai ni lo, kum tam kaltaa ka sawi zauh thin, ‘Kris-tian band kan nih loh thu’ ah hian inhnialna a tam thin hle a, ‘Eng a!’ tia chhuahchhaltu pawh kan tawngzing tawh. A nihna takah chuan, rock band pakhata awm Kristian kan ni. A danglamna leh in-an lohna in hmu thiam turah ka ngai.
A ruh langin aw!
“PETRA hi Kristian band angin ka hmu a, chutiang zelin SWEET COMFORT leh REZ BAND te pawh hi Kristian band angin ka hmu. A chhan chu, rock band pakhata Kristian awmkhawm an ni mai. Anni ho hi Kohhran-a inhnimphum a, kohhranin a chawm seilian te an ni. Keini erawh chu kohhran chawm seilen kan ni ve lova, Los Angeles kawtthlera tal ve mai mai kan ni. Zu leh thil tha lo hrang hrangin min chiah piah. A hnu-ah Kristian kan ni.
“Chuvang chuan, Kristian awmkhawm rock band kan ni mai. Kristian band kan ni reng reng lo. Mahse, Mite’n Kristian band anga min chhal chuan a tha vek tho. Mahse, kawng hran zawh tuma penchhuak band angin ka inhmu tho,” a ti.
Kum 39 kaltaa din STRYPER band hian an hming put chhan hi Isiaiah 53.5-a inziak, “But he was wounded for our transgressions, he was bruised for our iniquities: the chastisement of our peace was upon him; and with his stripes we are healed.” a nih thu an sawi.
An album pathumna, ‘To Hell With The Devil’ (1986) kha chetha in, contemporary Christian act zinga platinum album kai hmasa ber ni mah se, Kristian zingah a tla na lo a, an dawngsawng tha hek lo. Kohhrana lawi tam takte chuan Kristianna leh heavy metal hi inkawprem thei lovah an ngai hmiah.
STRYPER album zingah, “To Hell With The Devil”, “Second Coming”, “No More Hell To Pay”, “Fallen”, “God Damn Evil” leh album thar ber, “Even The Devil Believes” te a lar hle.