Social activist Vanramchhuangi’n Myanmar atanga kuhva leh bungraw dang (Indo-Myanmar Trade kaihhnawih) chungchanga FIR a theh luh bawhzui turin police-ten court thutlukna an ngaichang mek.
December 29, 2021 khan Vanramchhuangi (Ruatfela Nu) hian Indo-Myanmar Trade kaihhnawihah chhiah awl rukna a awm ngei nia hriain, a chhui zui turin Champhai Police Station-ah FIR a thehlut a, ni kua a liam hnuah pawh FIR hi bawhzui a la ni lo.
Hemi chungchanga The Zozam Times zawhna chhangin Champhai police hotute chuan Ruatfela Nu-in FIR a theh luh chungchanga hmalak zel dan turah district court-ah cognizance pe turin FIR hi an thehlut tih an sawi a, court thutlukna azirin FIR hi bawhzui tur a ni tih leh hmalakna hi FIR thehluttu hnenah hriattir a ni tawh tih a sawi.
Thudawn danin FIR-ah hian court-a inlan tur ziah lan a awm loh avangin hei hi tihchian ngai a la ni a. FIR thehluh hi commercial offence a nih avangin police branch eng berin nge an chhui dawn tih chu hriat theih a la ni lo.
Hetih lai hian December 18, 2021-a Kelkang daia kuhva rah man sa kang kaihhnawiha Lalhruaitluangi, Chaltlang Lily Veng, Aizawl-in Champhai Bawrhsap Maria CT Zuali laka Champhai Police Station-a FIR a thehluh chu thubuai ziah luh ni mah se nimin thlengin bawhzui a la ni lo a, amah chhui phalna Mizoram sorkarah dil a la ni lo a ni.
Dan loa kuhva tawlh khapna thupek lo chhuah tawh thintu, Champhai Magistrate Maria CT Zuali chuan nimin khan dan kalha kuhva leh thinghmarcha lakluh leh phurh chhuah khap a nih thu a puang nawn.
Maria CT Zuali chuan sorkar laipui, Ministry of Home Affairs leh Mizoram sorkar Home Department-in dan kalha Myanmar atanga kuhva leh thinghmarcha lakluh leh phurh chhuah khap tura a tih bawhzuina kal zelah thupek hi tihchhuah a nih thu tar langin, Customs/Police/Assam Rifles Check-gate leh kawng tum dang dang atanga dan kalha kuhva leh thinghmarcha lakluh leh phurh chhuah khap a ni tih a tar lang.
Khapna thupek hian e-waybill lem hmang leh customs duty leh chhiah (tax) chawina lehkha, awm loa bungraw phurh a khap tel nghal tih tar langin, thupek hi thla hnih chhung kenkawh tur a ni a; a zawm lote chu IPC Section 188 hmanga hrem an ni dawn tih a tar lang bawk.