World Health Organization (WHO) chuan Omicron variant thawh dan chu ‘a na lo’ (mild) tia sawi chu a nih ngawt loh thu leh khawvel pumah mi nunna a la mek tih a sawi.
Tun hnaia Omicron zirna hrang hrangah he hri hi a hmaa Covid variant lo chhuak tawhte aiin a kaite-ah natna a thlen nep zawk tih hmuh a ni.
Hetiang a nih mek lai hian WHO chief Dr Tedros Adhanom Ghebreyesus chuan a kai an tum zel avangin damdawi in leh enkawltu indaih lohna a thleng mek tih a sawi.
Thawhtanni khan United States-ah chuan darkar 24 chhungin mi maktaduai khat chuangin Covid hi an kai hman.
UN hnuaia vantlang hriselna lam ngaihtuahtu, WHO chuan khawvel pumah kar liam ta chhung khan a kai hi 71% zetin an pung niin a sawi a, America ramah phei chuan 100%-in an pung niin a sawi a. Khawvel puma hri kai zinga a la na zual 90% chu invenna la lote an nih thu a sawi bawk.
“A bikin invenna la zingah, Omicron hi Delta aiin a thawk nep zawk anga a lan mek laiin ‘na lem lo’ anga dah ngawt a dik lo,” tiin Dr Tedros hian Ningania thuthar lakhawmtute a kawmnaah a sawi.
“Variant hmasate ang bawkin Omicron avangin miin damdawi in an pan a, an thihpui mek a. A kai hi rapthlak khawpin an pung chak bawk si a, khawvel pumah damdawi in a buai mek a ni,” a ti.
Omicron hi inkai awlsam tak leh invenna bikima la tawhte pawhin an kai mai theih a ni a. Mahse, na taka natpui leh damdawi in luh ngai khawp nih theihna lakah invenna hian a veng thung.
Ningani khan UK-ah chuan hri kai mi 1,79,756 hmuh niin mi 231 thi an awm bawk a. Damdawi in tam tak chu thawktuten an kai ve bawk avanga an thawh theih loh avangin an buai hle.
Hmun tinah damdawi in lut an pung a. France Health Minister Olivier Veran chuan January thla hi damdawi in tana hun khirh ber tur a nih th a sawi lawk hial.
Veran-a hian Omicron kaite hi damdawi in khum pangngaiah pawh an mu mai thei a, Delta kai erawh kha chuan ICU department an tibuai nasa zual niin a sawi a. France-ah hian Ningani khan hri kai mi 2,61,000 vel an nei a ni.
Serbian President Aleksandar Vucic pawhin an damdawi inte an buai tak zet tih a sawi a. Tual chhung chanchinbute chuan Ningani khan mi 9,000 chuang hri kai an hmuh thu an tar lang.
WHO chief Dr Tedros chuan ram hausa zawkte chu ram rethei zawkten invenna an lak ve theihna tura inpe turin a sawm nawn leh.
Vaccine pek chhuah tawh dan dinhmun enin WHO-in July thlaa khawvel mihring 70% vel hnena pek hman an tum chu ram 109 velin an phak dawn lo niin a lang.
Nikum khan WHO chief hian khawthlang ram hausaten booster dose an pek an tawpsan a nih chuan kum 2022-ah chuan khawvelin a mamawh ang khawp vaccine a awm dawn thu a lo sawi tawh a ni.