Mizoram hmeichhe cricketer te inelna Women’s T20 Trophy final chu Inrinni khan an khel a. Derhken Team in wicket 8 in Ainawn Team hnehin champion trophy an chawi.
Suaka Cricket Ground a over 20 inelna final ah hian Ainawn in vuak hmasak an thlang a. Bat hmanga inelna hmuhnawmah vaw hmasa lamin run 112 an siam.
An opener pahnihte wicket tla hma mahse tun tournament a final an luh theih chhan zing ami Thelma Renthlei a che tha leh a, out lova run 49 siamin Felfeli Pautu (39) nen an inkawp laiin run 98 an vawchhuak a, over 20-ah target pangngai tak an siam theih phah.
Derhken bowler-te zingah Hmangsaihsangi Syhlo, Irene Ralte leh Lalruatsangi ten wicket khat theuh an la.
Tun tournament a an inkhelh apianga la chak vek Derhken tan 112 um kawngah chetsualo theih a ni a. Nimahsela an batter ten an tih tur tak an ti thei zel.
Tournament chhunga an chakna hnar ni fo Hmangsaihsangi’n run 15 siamin bul a tan a, a wicket a tlak hnuah a hnua rawn chhunzawmtu Ramchhuansangi leh Ramengmawii Singson ten run 23 leh 15 an thawh a. A tir atanga a tawp thleng a dam, run 40 siamtu Mapuii Pachuau chu thlawp zelin over 19.3-ah wicket hnih chiah hlohin run 113 an siam.
Ainawn bowler zingah wicket la an awm lova, Derhken wicket hloh pahnihte hi run out ve ve a ni a. Ainawn in an innings-ah partnership nghet pakhat chiah an neih avangin ball hmangin an run tuk zat an hum zo lo.
Hmeichhe champion hian team angin trophy bakah prize money Rs. 15,000 an dawng a. Runner up in Rs. 10,000 an dawng.
Player of the match, Best Batter leh Best Bowler ten Rs. 1000 theuh an dawng a. He tournament a tel player zawng zawngin Rs. 2500 an dawng theuh bawk
Womens T20 Trophy
Final
Derhken vs Ainawn
Suaka Cricket Ground, Sihhmui, Aizawl, 20 Ov., Limited Overs, 08-Jan-22
Toss: Ainawn opt to bat
AINAWN 112/3 (20.0 Ov)
Thelma Renthlei 49*(63)
Felfeli Pautu 39(45)
Irene Ralte 1/13(4)
Mami Syhlo 1/16(4)
Lalruatsangi 1/20(3)
DERHKEN 113/2 (19.3 Ov)
Mapuii Pachuau 40(60) Ramchhuansangi 23(28) Ramengmawii Singson 15(11)
Hmangaihsangi Syhlo 15(21)
Lalhriatpuii 0/10(4)
Derhken won by 8 wickets
Player of the match : Mapuii Pachuau (Derhken)
Player Awards :
Player of the tournament : Hmangaihsangi (Derhken)
Best Batter : Thelma Renthlei (Ainawn)
Best Bowler : PC Vansangzuali (Zamzo)