Rimawi khawvela an rawn kirleh khan member kim biai beisei an nih laiin, band dintute zinga tel leh rythm tum thin Izzy Stradlin a tel lova, fan te hrilh a hai. Zawhna a tam a, member dangte hian an sawi chiang fak lo bawk.
Guns N’ Roses hi April 2016 khan reunion show nei tanin, tour pui tak an nei chho zui bawk a, an mahni inkara chin fel thei lohna harsatna hrang hrang vangin Izzy hian band a zawm thei lo. Drummer Steven Adler hi nghet bur lo mah se, a khât tawkin a rawn lang ve zauh bawk.
‘Not In This Lifetine’ trek-ah classic line up atang khan Slash, bassist Duff McKagan leh zaipu Axl Rose hi an nghet a ni deuh mai a, Classic Rock magazine chhuak thar berah Slash chuan, “Khami hnu lam khan kan inbe mumal tawh lo. Harsatna chi hrang hrang a tam angreng a, chipchiar takin sawi lo zawk ang. Chin fel kan duh viau na a, thu kan inhmu thei ngang lova, chuvang chuan classic-era band ang khan inlan a theih ta lo a ni ber mai,” tiin an dinhmun a sawichhuak.
Hetih lai hian, tuna an hman rim tak leh 2002 kuma GN’R guitarist ni zui ta Richard Fortus bula khawsak hi Slash hian nuam a tizawk nia sawi a awm a, guitar player pahnihte an inmil viau bakah an inlaichinna pawh a that bawk avangin Izzy tan remchanna a zim tial tial a, sum a phut hnem ve bawk nia sawi a awm bawk avangin band anga an tour zelna turah atan kawng a inhawng tawh lo tura ngaih a ni.