HMEICHHE HUANG
Lei chung Van hnuaiah hian nupa inhau ngai lo leh innghirngho ngai lo hi an awm lova, khawvel tawp thleng pawhin an awm lo bawk ang. Nupa hlim takte hi an inkara harsatna awmte tha tak leh inpawh taka sawi dun a, chingfel thinte hi an ni.
Khawvel a changkang tawh a, nangmahni pawhina in chinfel theih loh tur thil anih chuan mithiam tak tak rawn tur an awm tawh a, in-thlahrunna nei miah lova pan thin tur a ni. Engpawhnise, nupa nuna buaina leh harsatna lian ber hi chi nga (5)-in hlawm lian deuhin then dawn teh ang.
Hun inhman pui tam tawk lohna:
Hun inhman pui leh intawi-awm thinna hi damchhunga chinthan (habit) tur thil pawi-mawh em em a ni a, inneihna chhan lian ber pawh a ni reng a sin. Fate an puitlin hnu phei hi chuan hun inhman pui leh intawiawm thinna hi a hmâ zawng aiin mamawhna a nasa zawk a, mahni tul tula tul a, mahni buai buaia buai reng mai hi nupa nun tikhaw lo vek thei thil a ni. A hranga hun hman a tam poh leh buaina leh harsatna a tam ting mai a, inrinhlelhna leh inpuhtawnnain a zui nghal mai thin.
Sum leh pai harsatna:
Engtik ni ni-ah emaw chuan hausa leh rethei pawh ni rawh sek sek, sum leh pai chungchanga harsatna leh luhaina hi chu a lo thleng ngei ngei dawn. A nei ngah deuhte’n a hman dan leh theh-chhuah danah ngaihdan inhmuh lohna avanga an buai laiin, rethei deuhte pawhin hmanna tur a tam si, neih awm bawk si loh vangin nupa nun a nghing lawih lawih thei bawk. Kârah fate an lo awm tawh phei chuan a khirh hle thin. Harsatna a lo awm hlek chuan mahnia chinfel tum mai lovin, ‘pum khat kan nih kha maw’ tia nupaa sawi dun a, chinfel dan ngaihtuah vat tur
Eizawnna leh hnathawhna:
Nupa nih hnu-a hna han thawh meuh chuan, In lama mawhphurhna chung-changah leh hun inhmanpuina thu hla-ah buaina a lo chhuak nghal pang zel. A châng chuan, loh theih lohna avanga awmdun leh khawsak theih lohna pawh a awm fo.
Hei hi hun harsa leh khirh em ema chu a ni a, dimdawi taka kalpui a pawimawh hle. In chhung leh a boruak hi nilenga hnathawh hnu-a hlim taka tluk-luh lehna hmun a nihna hi hriatnawn fo a ngai bawk. Chuti anih loh chuan, hnathawhna hmun-a midang kawp leh zui maite hi thil harsa a ni lo thin a, nupaa indem ve ve harsa tak dinhmunah a thleng thei.
Kawppui dang neihna:
A châng chuan hmeichhia-te hian pa berin kawppui dang a neih pawhin an sawi chhuak ngal mai lova, engkim a nih tur a nih tawh hnu-ahte an sawi chhuak chauh thin a, mahse a tlai viau tawh thin.
Kawppui laka rinawm-lohna laimu bera hi nupaa hun tam tawk hman dun loh vang leh thinlung leh tih tak zeta inngaihsak lantirna a awm thin loh vang a ni châwk. In chhung boruak a nuam lova, a hrehawm anih phei chuan kalsual hi a harsa tawh thin lo.
Nupa inkara harsatna a awm tih hrereng chung pawha chinfel aia inrunluihna a tam poh leh rinawmlohna hi a lut thuk tulh tulh a, kawppui dang neih mai hi thil harsa a ni reng reng tawh lo.
Sex-a harsatna:
He thil a lo lan tawh hi chuan thenkhatte hi an kimki chawih chawih anih loh vek paw’n hlauhrukna engemaw tak an nei thin. Hengte hi chu mithiamte thuziak chhiar a, rilru-a rinhlelhna awm thei te paih kian khan a zia viau thei.
Mihring taksa leh a thawhdan hrethiam lo kan tam chhung hi chuan rilru-ah chian lohna a tam tulh tulh a, nupa hlimna pawh thlen a harsa fo reng a ni. Engvanga inpawl laia nâ ti em em nge i nih le? He zawhna ringawt pawh hi mumal takin i chhâng thei ang em? Family planning lo neih lawk te, chhangkhât tura rua-hmanna siam lawk te leh a tul hun-a indanna damdawi ei hun turte thleng-in in inhriat pui chiah em? He thil hi nupa nun tihlimtu leh tibeidawng thaktu anih miau avangin ngaih-pawimawh a ngai.
Mamawh inphuhruk tawnna a awm lohva, a vawr-tawp pawh i thleng ngai lo anih chuan engnge a chhan ni thei ta ang? I pasal khan Zu a in nasa em? Zial a zu khu luih luih thin em? Chin dan tha lo dangte a nei em? Inpawlna hlimawm tak hi mipakhat (solo) anga kalpuina chi a ni lova, thinlung taka induhsakna a ni zawk.
Mipat hmeichhiatna hi a châng chuan, mimal thil a nih theihna laite pawh a awm ang. Pakhatin a duh lai khan pakhat tan hun tha a ni kher lo thei. Mahni hmasial taka eng-mah kalpui loh tur. A hun leh a hmun inhriatpui tawn ve ve hi a ngai em em a ni.