Mumbai police te hnenah bomb hmanga pawikhawihna hlenchhuak tura insawi mi pakhat chu Jabalpur, Madhya Pradesh-ah man niin, bomb darh vek tum nia a insawinaah hian Shah Rukh Khan In, Mannat pawh a tel.
Police te’n an thu dawn bawhzuiin Shivaji Maharaj Terminus (CSMT) leh filmstar SRK chenna bul hnai vel endik zui a ni a, rinhlelh tur thil hmuhchhuah an nei lo thung.
CSP Alok Sharma chuan, “Maharashtra police atangin call kan dawng a, chutah chuan Jabalpur lam mi pakhatin pawikhawihna hlenchhuah a tum, tih a ni a, phone hmanga vautu man tura min rawn ngenna a ni ber. Tunah hian kan man tawh a, thubuai siamsak nghal a ni,” a ti.
Jabalpur ASP Gobal Khandel pawhin Maharashtra police atangin mobile number an dawn an bawh-zui a, Jitesh Thakur (35) chu an man nghal a ti a. An mi man hi zu nghawlvei, tunhma lam pawha call hmanga mi vau ching a nih thu te, police emergency number 100 hmeh ching tak a nih thu thlengin a sawi bawk a ni.
Doja Cat concert-ah Bomb hmangin invau!!
US-a zaithiam lar Doja Cat concert-a mipui intlar kara zuanluh a tumna lama Bomb tihpuaha vautu chu police-in an man.
Thil thlen dan
Indianapolis-a free show-ah hian fan tam takte chu concert chhim ngei tumin darkar 12 chuang an intlar a, nizan hmasa dar 5 vel khan mi pakhat chuan a bag paiah bomb a awm thu sawiin, tlar hmalamah a inzeplut lui.
Police an cherang hle a, minute 20 dawn a hmun hma vel an enfiah hnu-ah a bag pai hi uluk takin an enfiah a, hlauhawm a awm lo tih an chian veleh concert hi kalpui chhunzawm a ni.
Bomb pai nia insawi hi tunhma lamah pawh thubuai neih vanga zawn leh a pawi-khawihna te vanga man tâwk tawh a ni nghe nghe.