HMEICHHE HUANG
A rûkte-a a hmangaih em emna che – 10
- Robert Zoliana
Ni e. I piannalhna leh i hmui ‘sexy’ tak mai bakah, i lan dan duhawm leh itawm ringawt kha chu mipa tan mamawh chhanna tluantling a ni thei chuang lo. Hengte hi thil pawi-mawh tak a nih rualin, mipate’n hmeichhiate laka an luanliamna leh far zawih zawih-na chu hengte hi a ni:
1 Film enlaia i mittui tla thin leh thil hote-a tap thin i nihna hi!
Mipate hian engemaw deuh hlek a, i mittui a tlak a, i tah chiam te hi hmuhnawm an ti a, an rilru a hneh thei hle a, i tla na hle bawk.
Pate-a chuan, “Rilru no takte hi a châng chuan an duhawm thin ka ti. Pasal te nena inkar boruak chhiat palh te hi an hlauh em avangin boruak tha tak hnuaia engkim kalpui hram hram an duh thin a, engemaw deuh hlek a, mittui tling lehkuau thinte hi ka tan chuan an hlutna tizualtu a ni,” a ti.
Hetianga hmeichhe nihna dik tak i lantir hian, mipate’n kawng engkima tanpui leh venpui i ngaihna hi an hrethiam nghal thuai thin a, chu chu i tan malsawmna hlu tak a tling bawk.
2 Thawmhnaw leh incheinaah i tlakchham lem lohin
Hmeichhiate’n pheikhawk leh slipper atanga tlereuh leh, incheina te thlenga an buaipui laiin, mipa te pawhin pawn lam lan danah rilru zawng zawng tih mai tur hi an pe ve thova, an nupui/bialnu te’n tlakchham nei lem lova an awm nia an hriat hian an lawm em em thin.
Pui-a chuan, “Kan nu hian thawmhnaw leh incheina leinan sum a hmang nasa hle a, vawi tam tak ka hrilh tawh na-in, a nihna takah chuan thinlung takin ka lawmpui tho. Mawi tak leh duhawm taka a inchei leh tlakchham tehchiam a neih lem lohna hi ka tan chuan inchhuanna tham a tling ve tlat,” a ti.
3 Mamawh chhanna nia an inhriat hian
Thil pawimawh tawp khawk a lo lan a, tithei leh buaipui thei nia inhriatna hi mipate chapona leh induhna vawrh kang lehzualtu a ni fo. I tihteih loh leh thiam lohte kha tlawmah la lovin, hawih hawm takin rawn thin la, zawt rawh.
Mobile phone hman dan chungchangahte thlengin ninawm si lovin han zawt vel teh le, a ruk takin nuam a ti viau ang. Mangang laia tanpui theitu a nihna hi a hre ve kar thin a sin.
Mipate hian VVIP anga han chet leh khawsak vel hi nuam an tibang thei lova, an thei emaw thei lo emaw, an tlin emaw tlin lo emaw mamawh chhanna nih an tum hram hram thin a ni.
4 Tukthuan tui tak i siamin Hmeichhia leh mipa intluktlan tuma thu leh hla eng eng-emaw vawrh lar mek anih lai hian- eirawngbawl thin mipate pawh an tam sawt hle a, pasal te ei tur tukthuan tui tak siam sak hi a hmangaihna che tizual thei tu a ni tlat.
Zara’n a hrechiang a ni ang. “Ka nupui hi office-a nilenga thawk thin a ni a, In-ah awmpui kan nei na chungin, zing hmâ taka thovin, tukthuan tui tak min siam sak a, chumi avang ringawt pawh chuan ka hmangaih hlum lo chauh reng a ni,” a ti thlawt.
Sawi buai a harsa e… mipate hian thawh hreh an neih lo tial tial mek laiin, hmeichhia te tih tur leh thawh tur te erawh hi chu an hre ve tho.
5 Hlim taka a fiamthu i nuihpui te hian
Kima’n a chiang khawp mai. “Thinrim teuh chung pawha engemaw ka sawi deuh hlek a, ka bialnu a lo nui chhuak leh sâng maite hi tawrh har ka ti a, ka rilru leh thlarau zawng zawng hi a kutah ka hlan nawn fo reng a ni,” a ti.
Thinlung taka i seih leh nuihna kha mipa tan tawrh har tak a ni a, hlimna a pe a, thil mak a thlen thei tih ringhlel bawk suh.
Mipate hian an kawppuite vangin an chi-ri a, an khur hlum lo chauh thin tih hi an zep thei te pawh a ni ang, amaherawhchu- a ti nui thei che a nih chhung hi chuan pawimawh ve tawka inngaih-na pawh mipate hian an lo nei ve a nih pawhin dem theih an ni reng reng lo.
(Chhunzawm tur)