Jeep Meridian tiamin India-ah Jeep thar pathum
American SUV siamtu lar Jeep chuan India ram market-ah kumin chhung hian an lirthei pathum tichhuak tûrin ruahmanna an siam a. Jeep Compass Trailhawk chu February thlaah an tihchhuah hman beisei a ni.
Hei bakah hian India ramin rei tak a lo nghah tawh 7-seater Jeep Meridian chu June thlaah tihchhuah hman beisei a ni a. Khawvel huapa Jeep lirthei lar tak Grand Cherokee chu India rama siam loin remkhawm a ni dawn bawk a ni.
Jeep Meridian
Jeep Meridian hi tuna Jeep Compass chhuak mek platform nghahchhanin seat tlar thum, mi 6 leh 7 leng tura duan a ni dawn a. 6 seater bikah hian a laiah captain seat a awm dawn a ni.
Report hrang hrangin an tarlan danin Jeep Meridian hi FCA Ranjangaon facility atangin siamchhuah a ni dawn a. He hmun atang hian ramdanga thawn tur right hand drive lirthei bik pawh siamchhuah tura ruahman a ni.
Jeep Meridian hian Jeep SUV lian ho – Grand Wagoneer leh Grand Cherokee te landan a rawn pawl dawn a. A lenzawng tur hi 4,769mm a thui, 1,859mm a zau leh 1,682mm a sang a ni dawn a, a wheelbase hi 2,794mm a thui a ni dawn a ni. A wheelbase hi Jeep Compass chhuak mek aiin 158mm in a thui dawn a.
A lirthei sei zawngah chuan Compass aiin Meridian hi 364mm in a sei a, 41mm in a zau a, 42mm in a sang zawk bawk a ni.
Jeep Meridian chhuak thar tur hma lam hi Compass nen a inang dawn a. Hetah hian an signature slat grille leh rectangular full LED headlamp a tel dawn a ni.
Jeep Meridian hian bumper thar hlak a nei ang a, hei bakah hian LED tail light, faux vent lian tha tak, LED DRL leh fog lamp leh chrome strip te a tel dawn a ni.
A chhung lamah chuan Meridian hi Compass nen a inang dawn a. Hetihrual hian an siam nana hmanraw hman te hi tha lehzual leh changkang lehzual a ni dawn a ni. He SUV hian 10.21 inch all-digital instrument console leh 10.1 inch touchscreen infotainment system, android auto leh apple carplay keng tel a hmang dawn bawk a ni.
Jeep Meridian hian 2.0 litre 4 cylindee turbocharged diesel khawl, 48V mild hybrid system keng tel a hman hmel a. Power lamah 200bhp a pechhuak thei ang a, 9-speed automatic gearbox, All Wheel Drive system keng tel a nei dawn bawk a ni.