Mixed martial arts inelna lian Ultimate Fighting Championship a fighter inmil lo langsar tak pahnih inkar chinfelna chu March 6-ah a thleng dawn a. UFC 272-ah welterweight fighter tha pahnih Jorge Masvidal leh Colby Covington te an intum dawn.
UFC Chief Business Officer Hunter Campbell chuan Thawhlehni zan khan Las Vegas a March 5 a inelna an buatsaih tur hi a puang a. Mizoram-ah chuan March 6, Pathianni tukah live in a en theih ang.
He 170 pound bout atan hian contract la ziah fel ni lo mahse inremna thuphungin a awm tawh a. T-Mobile Arena-ah round nga chhung an intum dawn.
Covington chuan an intum tur hi sawichiangin “A rawn inlan ngei ngei loh chuan a pawi ang.” tiin MMA chanchinbumite hnenah a sawi.
Chiang zawkin
UFC 272-ah hian UFC chuan featherweight leh bantamweight title inchuhna kalpui turin a tifel tawh a, mahse hengte hi April thla a UFC 273-ah a sawn hla zawk a. Chhan hrang hrang zingah featherweight title chuh tur Max Holloway inhliam avanga South Korean fighter Chan Sung Jung tihfel ngai chu a lian.
Professional MMA a fighter ngaihven hlawh Masvidal hian vawi 35 chak neiin vawi 15 a tlawm tawh a. Nikum April thla a welterweight champion lai Kamaru Usman laka knockout a a tlawm hnuah cage chhung a la lut leh lo.
Masvidal hi a inel hnuhnung pahnihah Usman ve ve hmachhawnin July 2020 khan unanimous decision in a tlawm tawh.
16-3 MMA record nei ve thung Covington hian nikum November thla khan Usman hi hmachhawn ve in UFC 268-ah unanimous decision in a tlawm.
Welterweight lalpa Usman nen hian kum 2019 December khan 170 pound title inchuhin an inhmachhawn tawh a, hemi tum hian interim champion Covington hi a khingpui nen nasa taka kut inthlakna ‘fight’ hmuhnawmah point hmanga chak zawk thei dinhmunah a ding a, mahse round hnuhnung ber tawp dawnah Usman hi technical knockout in a chak hram.
Hemi fight pahnih inkarah hian welterweight champion hlui Tyron Woodley chu a hneh bawk.
Chinfel tur chu
Fighter tawng duh leh hmuhnawm pahnih, an huaisen avanga mipui ngaihven te hi tunhma in South Florida a MMA gym lar American Top Team-ah training nei dun thin an ni a. Team khat a awm thiandun hi hun engemaw chen chhung phei chu in khat a cheng an ni thin.
Nimahsela kum 2018 khan inkar a tha lo tan a, kum 2020 khan Covington chuan a team hi chhuahsanin an inkar a chhiat hnuah hian Masvidal nen hian tawngkam in an inbei chhunzawm nasa thin hle.
Nikum December a Masvidal leh Leon Edwards te intum tura Masvidal a inlan theih loh chhan hi Covington chuan a hriat thu tunhnaia tawngkam a an inbeihnaah a sawichhuak a. “Jorge Masvidal kha a nakruh a tliah avangin a inlan thei lo a nih kha. An gym-ah sawn kei min ngaina a ka lam tang tlat an la tam a, hengte hi ka hre thei vek. Training-ah a inhliam a, a no ru tlat a ni. An gym-ah sawn ani aia ngainat ka la hlawh zawk.” a ti a.
Masvidal hian Covington-a’n gym a chhuahsan chhan an zawhin, “A chhuak aiin la awmte hi en ula, hei hian thil engkim a tilang chiang. Thudik chu a lang mai ang. Coach Dan Lambert zawt mai ru. Hepa hi he team mi leh sa tak tak ni a ni ngai lo.” tiin a lo sawi tawh.