Uttar Pradesh-a Yogi Adityanath-a kaihhruai sorkar chuan minister a chân leh ta a. Ningani khan hnam hnufualte hruaitu, Dharam Singh Saini chuan BJP a chhuahsan dawn lo tih a sawi hnu lawkah a nihna a bânsan.
Assembly inthlan nan thla khat pawh awm tling tawh lovah BJP hian ni thum chhungin MLA pariat a hloh ta a. Heng mite hian Akhilesh Yadav-a kaihhruai Samajwadi Party an zawm rin a ni.
Saharanpur district-a Nakud bialtu MLA, OBC (Other Backward Class) hruaitu pawimawh tak, Saini-a hian Nilaini maiah khan BJP a chhuahsan dawn nia an sawina chu a lo pha tawh.
Ama hmaa minister nihna bânsantu, Swami Prasad Maurya pawh a sawisel chiam bawk.
“Kei hi BJP-ah awmin ka awm zel dawn a, party ka chhuahsan dawn lo,” tiin chhuak ve tur anga an sawina chhangin video hmangin thuchah a sawi.
Yogi Adityanath-a pawhin phone-a biain bâng lo turin a thlem bawk.
Mahse, a hnu lawkah a hmaa mite ang bawkin a bâng a. A hmaa mite ang bawkin Yadav chuan thla an lak dunna thlalak chu social media-ah tar langin a lo lawm thu a tar lang tel.
Yadav-a hian #MelaHobe tih chu a hmang tel a, hei hi Trinamool Congress-in West Bengal inthlana an hlawhtlinpui, ‘Khela Hobey (game on)’ tih tho kha a ni.
Saini-a hi tun hma chuan Mayawati-i kaihhruai, Bahujan Samaj Party (BSP)-a tel thin niin kum 2016 khan Maurya nen BJP an zawm.
Thla khat pawh tling lova inthlang tawh tur, Uttar Pradesh-a sorkarin a minister pahnih leh MLA paruk a hloh ta a, hei hi eptu, Yadav-a kaihhruai party tan hlep a ni thei dawn.
BJP hruaitu bâng sup sup bul tantu, OBC hruaitu, Maurya leh mi dangte hian an zawm tur la sawi lo mah se SP a nih ngei a rinawm hle.
Yadav-a hian heng hruaituten bânna an thehluh hnu lawkah thla an lakna tar langin an party-ah a lawm thu a tar lang tel zel thin.
Maurya hian a zawm tur party hi a la sawi chiang lo va, Zirtawpniah a tichiang dawn tih a sawi.
BJP hruaitu bâng tate hi hnam hnufual hruaitu an nih vek hlawm avangin rorel lai party tan heng hnamte vote chân duai theihna a ni thei.