MCS siksawi thenkhatte hi chu a hun lo deuh lo maw?
Mizoram sorkar chuan ningani khan MCS siksawina order tichhuakin, kuhva tawlh chungchanga thawm ngah Champhai bawrhsap leh ramri issue-a huaisen taka hma la ngam, Kolasib bawrhsap te chu a sawnchhuak a, a sawn leh siksawi chungchang chu engpawh lo nise, boruak awm laia hetianga hma a la tel ve rum rum hi chu awm lo tihna leh sawiselna a tam phah hle.
Sorkar hnathawk an nih miau avangin anmahni lam atang chuan engmah sawibuaina leh lungawi lohna pawh a awm lo ngei ang a, lawm leh lungawi takin anmahni post an pan ngei bawk ang. Mahse, boruak lian tham a awm lai khera hetianga hmalakna a awm rum rum erawh hi chu mipui thinlungah a lian lo thei lo a, sorkar hian ngaihtuah chiang chungin nge, ngaihtuah lem lovin he order hi a siam ang tih pawh ngaihtuah zui theih tak a ni bawk.
Champhai bawrhsap ni lai Pi Maria CT Zuali chu Additional Secretary, FCS&CA/Planning & Prog. Implementation in a awm dawn a, Kolasib bawrhsap Pu H. Lalthlangliana chu School Education Director thar a ni dawn bawk. MCS dang pawh siksawi a ni nual a, anni pahnih hian boruak an nei lian zual bik hle a ni.
Sorkar hian a duh chuan thil hi a tithei khawp mai a, ruahmanna pawh a siam thiam thei khawp. Mahse, a hun leh ni tur hi a thliar thiam tawk lo deuh nia ngaihna a lian zual chho hle mai a, mipuiah an tla na tawk lo chho telh telh nia ngaihna hi a lian chho ta hle. Nakum maiah MLA inthlan kan hmachhawn leh dawn a, mipui lam hian kan transfer ve mai ang tih hlauhawm tak a ni.