Congress party chuan sorkar hnathawk Group B,C leh D-te chu a ruala hlawh pe tur leh, Champhai bawrhsap sawn chungchang ngaihtuah nawn leh turin Mizoram sorkar an ngen.
MPCC media department chuan nimin khan Aizawl Press Club-ah chanchinbumite an kawm a, an chairman Dr Lallianchhunga chuan MNF sorkarin a hnuaia hnathawkte hlawh pek tur a nei lo a, Group A leh B-ten December thla hlawh pawh tun thlengin an la la thei lo tih sawiin, hlawh an lak mumal theih loh avangin sorkar hnathawk tam takin sum leh paiah harsatna an tawk mek tih a sawi.
Sorkar hnathawkten hlawh an lak theih loh avanga harsatna an tawh mek chu tun hnaiah an ching fel theih mai lo a nih pawhin, hlawh inthlau lutuk, Group A leh B-te chu a ruala hlawh pe tawh lo turin sorkar an ngen tih a sawi a, “Group B te hi Group C leh D-te hlawh lak ruala pe tawh turin MNF sorkar kan ngen,” a ti.
Dr Lallianchhunga chuan sorkar hnathawk pension-a chhuak tam takin kum khat dawn lai a liam hnuah pawh pension pawisa an la la thei lo tih a sawi rualin, sorkar chu budget-ah sorkar hnathawk pension puala sum dah kim tur nei loah a puh a, Mizoram sorkar sum leh pai dinhmun chu nasa taka tichhe mekah MNF sorkar a puh bawk.
MPCC media department chairman chuan Champhai Bawrhsap Maria CT Zuali sawn chhuah a nih chungchang pawh sawi telin, sorkar hnathawk sawn pangngaiah ram pum huapin mipui an phun luih luih ngai lo tih sawiin, Champhai bawrhsap sawn chungchangah erawh a ruka ram pawn atanga kuhva la luta tawlh ru thinte leh a thurualpuite duh dan anga sawn kalpui nia lang hian Mizoram mipui rilru a tina tih a sawi.
Mipui rilru natzia hriaa Champhai bawrhsap sawn chungchang ngaihtuah nawn leh turin MNF sorkar an ngen tih a sawi a. He issue hi dikna rah beh tumna lian tak a nih avang leh Mizoram Kristianna thlenga tihmelhem thei a nih avangin political party hmalakna mai a tawk lo a, Mizoram mipui zawng zawng huapa hmalakna awm thei se an duh thu a sawi bawk a ni.
&&&&&