Thiante zinga vun no ber pawla sawi i ni mai thei a, a no em vangin engemaw deuh hlekah i vun kha a rawn sen vak a, hnar leh biang vel pawh a tai hlur a ni mai thei. Vun ‘sensitive’ an ti a, hetiang vun neite tan fimkhur a ngai hle a, khaw vawt chho mai bakah nipui (khawlum) lai te thlengin inven nasat a ngai hle.
Nitina tih tur
A thak a, a thip hma em em a, a chhan leh vang awm lem lo paw’n a rawn sen leh vak thin bawk. Hetiang hi a nih chuan i vunina a mil tur leh ngeih tur hman a tul dawn ta tihna a ni a, a hmasaberin vun awm dan hi hriatchian phawt tum ang che.
Dr. Rekha Sheth chuan, “A tul leh hman ngei ngai a nih lem loh chuan mahni duhzâwng leh tha tih ang mai mai hman loh tur a ni a, engpawhnise- cleanser, moisturiser leh suncreen te hi chu kawl reng tur,” a ti.
Costmetologist Dr Pur-nima pawhin, “Moisturising cleanser hi i vun nen a inmil tur a ni a, pawn i chhuah dawn reng rengin sunscreen hnawih ngei ngei thin ang che. Nisa hian vun a tibuai hle a, a ti thak a, a ti ro thei bawk a, vun sensitive tak i neih phei chuan nisa hnuaia awm mai mai loh tur,” a ti ve bawk.
Soap free lam hman a that viau laiin, Deodorant leh anti-bacterial soap ang chi hian vun a tihro hma em avangin hman loh a tha a, body scrubs hman zawk tur a ni ang.
A thak a, a thip bawk
I vun a lo thak a, a thip (sa) deuh ser ser thin a nih chuan, mangan chiam chiam loh tur a ni. Hnawih tur chi hrang hrang a awm laiin, mahni siam chawp (home made) te pawh tangkai takin a hman theih tih i hre ngei bawk dawn nia.
Tin, hetiang thilah hi chuan Lacto calamine lotion pawh hi hnawih a him niin mithiam te chuan an sawi.
Vun sensitive tak a nih chuan
Tunlai chhuak thar, man to tak tak leh mi hmanlar a piang hman ve mai tumna hi a tha lo, sawi fo tawh angin i vun awm dan i hriat chian lohva, a mil loh vaih chuan awlsamtea talbuai theihna a ni. Dr. Purnima chuan, “Chhun lam ah chuan SPF telna makeup hman tur a ni a, company tha tak siam a ni bawk tur a ni ang,” tiin a sawi.
Ni lum pawimawh mah se…
Thlasik a vawt vin chho angreng hle a, nimin lam phei kha chu vawt tak a ni. Naktuk atang chuan khua tha chho pangngai tura sawi a ni a. Ni a lo chhuak tha a nih pawhin zing dar 8 hmalama Ni zung/eng dawn a pawimawh hle. Ni zung hian vitamin D a chhawm tel a, hunbi nei a, a tawk chauha dawn hian vun in a ngeih a, tar harna leh vun chuar, ung leh vuai tur a veng hneh hle.
Pawimawh dang lehah chuan, thlasik ah hian tui in lam a lang lo duh viau mai a, mahse a tul em em tho si a ni. Hunbi neiin tui in tam la, hunbi nei bawkin mu tha la, exer i lak that bawk chuan i vunah dang-lamna duhawm i hmu ang.