India rama COVID-19 laka invenna pek chhuah chuan kum khat a tling ta a, hetih chhung hian damdawi dose vaibelchhe 156.76 chuang pek hman a ni tawh.
Health ministry thuneitute chuan India-a puitling 93% chuang chuan invenna hi an la tawh a, 69.8% chuang chuan a bikimin an la tawh tih an sawi.
Invenna pekin kum khat a tlin pual hian sorkar laipui pawhin postal stamp tihchhuah a tum.
Union Health Minister Mansukh Mandaviya chuan India-ah hian nikum April 1 khan vaccine dose vaibelchhe 10 pek tlin a nih thu Twitter-ah a tar lang.
June 25-ah dose vaibelchhe 25 pek tlin a ni a. August 6-ah vaibelchhe 50 leh September 13-ah vaibelchhe 75 pek tlin hman a nih thu a tar lang bawk.
India-ah hian nikum January 16 atang khan damdawi ina thawkte pea invenna pek hi bul tan a ni a. February 2 atangin hri leng beihna kawnga hmatawnga thawkte pek tan an ni leh bawk.
March 1 atangin kum 60 chung lam leh kum 45 chin chung lam, natna benvawn neite hnenah pek tan zui a ni.
April 1 atangin kum 45 chin chung lam zawng tan pek leh tan a ni a. May 1 atang chuan kum 18 chin chung lam zawng tan pek zui a ni a. Kumin January 3 atang phei chuan kum 15 leh 18 inkarte hnenah pek leh tan zui a ni.
January 10 atang khan precaution dose (bosster dose) an tih chu damdawi ina thawk leh hri leng beihnaa a hmatawnga thawkte hnenah pek leh tan an ni a. Booster dose hi inthlang tur state pangaa duty tur leh kum 60 chin chung lam, natna benvawn neite an tel bawk.
Health ministry chuan India-in vaccine pek a kalpui hi khawthlang lam ram hausa, mipui tlemna ram nena khaikhin pawhin hlawhtling ber leh lian ber niin a sawi.
India-in invenna pek a chhung hian mellung pawimawh tak tak a phun a. Thla kua pawh tling lo chhungin dose vaibelchhe 100 a pe hman a, ni khata dose vaibelchhe 2.51 pek leh ni khata dose vaibelchhe khat chuang pek a nei nual tih a sawi.
Covid vaccine hi October 21 khan dose vaibelchhe 100 pek tlin a ni a. January 7 khan dose vaibelchhe 150 pek tlin a ni bawk.
Pathianni zing dar 7:00 thleng khan ni tin dose nuai 66 chuang hret pek ziah ang a ni a, a vaiin dose vaibelchhe 156.76 pek a ni tawh.
Booster dose bik hi dose nuai 43.19 chuang pek a ni tawh a. Kum 15 leh 18 inkar hnenah dose 3,38,50,912 pek a ni tawh bawk.