Mizorama District Institute of Education and Training (DIET)-a thawktute inzawmkhawm pawl, Association of Mizoram DIET Employees (AMDE) chuan kum 2021 atanga DIET-a thawktu thenkhatte hlawh central sorkarin state sorkar kuta a dah tak avanga harsatna an tawh chungchangah Mizoram sorkarin a ngaihsak avangin lawmthu an sawi.
AMDE hian School Education Minister Lalchhandama Ralte leh dept hotute bakah Directorate of SCERT leh Samagra Shiksha hotuten hma an laksak avanga DIET-a thawktuten hlawh an lak theih leh tak avangin lawmthu an sawi a. Kum thar lo awm zel turah pawh sorkarin ruahmanna fel tak siamsak an beisei thu an sawi.
“Mizoramah hian private a zirtirtu training na hmun a awm loh avang leh sorkar hnuaiah pawh DIET te anga ram pum dap chhuaka zirtirtu training kalpui thei hi an awm loh avangin DIET te hma a zauvin, tihchangtlung kan ngai em em a ni,” tiin, NEP 2020 tihpuitlin kawngah leh DIET te awm dan tur ruahmanna kawngah pawh sorkar hmalakna an ngaihchan reng thu, AMDE chuan an sawi bawk.