Shiv Sena leh Nationalist Congress Party (NCP) chuan Goa assembly inthlan lo awm turah an thawkho dawn tih Shiv Sena hruaitu leh an MP, Sanjay Raut chuan Pathianni khan a sawi.
ANI hnenah Raut chuan, “Shiv Sena leh NCP chuan Goa assembly inthlan hi an chuh dun dawn a. January 18 hian bial inchan sem dan tur an sawiho vang. NCP chuan an hruaitu hlun, Praful Patel chu bial insem dan tur sawi turin Goa-ah a tir dawn a, hemi hnuah hian tute nge chuhtu tur leh engzatah nge party-in a chuh dawn tih chu a hriat ang,” a ti.
“Politics kal vel dan hi Maharashtra leh Goa chu a inang lo va. NCP, Shiv Sena leh Congress hi Maharashtra-a thawkho an ni a. Goa-ah erawh hi chuan Congress hian mi dang thawhpui lovin, party mala chuh turin thu an titlu a ni,” a ti bawk.
Goa-ah hian February 14-ah mipuiten an aiawh thlang turin vote an thlak dawn a. March 10-ah vote chhiar a ni ang.
Uttar Pradesh assembly inthlan chungchangah Shiv Sena hruaitu hi Chief Minister Yogi Adityanath-a’n Gorakhpur biala a chuh leh tur chu a sawi thui duh lem lo.
“Pu Yogi-a’n Gorakhpur-a chuh leh tura thutlukna a siam hi sawi tur ka nei vak lo. A chawr chhuahna hmunah a chuh dawn a, a tha viau a. Aparna Yadav-i’n BJP a zawm dawn niin ka lo hre bawk a, hei pawh hriat nuam tak a ni bawk,” a ti ringawt.
Yadav-i hi Samajwadi Party hruaitu hlun tak, Mulayam Singh Yadav-a mo a ni.