Covid-19 inkai darh chak zawng an chhutna, R-value an tih chu India-ah chuan January 7 leh 13 chhung khan a tlahniam hret niin IIT Madras chuan a sawi.
R-value hi hripui leng a darh chak dan dinhmun enna pawimawh tak a ni a. India-a R-value thar berah chuan January chawlhkar khatna aiin chawlhkar hnihnaah dinhmun a ziaawm hret.
R-value an tih hi hri kaiin mi dang a kai zat sawina a ni a. 1 a nih chuan hripui leng chu ziaawm tihna a ni a, 1 aia a san chuan mi pakhat aia tam a kai tihna a ni a. India chu 2.2 a ni a, mi 100 hri kai awm ta sela, mi 220 a kai tihna a ni a, a let aia tam a la nih avangin dinhmun tha a la ni thei chuang lo va; a ziaawm hret tihna a ni thung.
Chawlhkar liam ta chhung khan India-ah hian R-value hi 2.2 a ni a, a la sang viau tho va; mahse, a hma chawlhkar aiin a tha zawk a. Mi 100 hri kai awm ta sela, mi 220 zet an kai dawn tihna a ni a, a letin an la tam tihna a ni.
IIT Madras-in a chhutnaah chuan January chawlhkar hnihnaah hian R-value hi Mumbai-ah 1.3, Delhi-ah 2.5, Chennai-ah 2.4 leh Kolkata-ah 1.6 a ni a. Zirchiangtute chuan chawlhkar khatnaah kha chuan 4 dawn a nih hlawm thu an sawi.
December chawlhkar tawp berah khan R-value hi 2.9 a tling lo deuh va, kum thar rualin a sang zui ta vak a ni.
R-value hi khawpui hrang hrangah a inzat lo thei hle a. A zat hi hri kaiin mi dang kai chhawng mai awlna dinhmuna a din dan te, a kaiin mi a tawh tam danah leh a kai atanga a kai a ni tih hmuh chhuah hun inkar rei zawngah te a innghat thui hle.
Tun hnai ni hnih thum chhung khan khawpui lianahte chuan ni khata Covid-19 kai hmuh zat hi a pung zawng ni lovin a ngai leh hniam zawngin a kal hlawm.
Mumbai-ah pawh ni khata mi 20,000 chuang kai hmuh a nih hnu lawkah mi 11,000 velah a tla thla a. Pathianniah phei kha chuan mi 10,000 hnuai lam ni tawh tura ngaih a ni.
Delhi Health Minister Satyandra Jain pawhin khawpui bera Covid-19 dinhmun chuan ziaawm lam a pan dawn nia a lan th a sawi a. Hetih rual hian hri kai hmu turin endik a tlem ve deuh bawk a ni thei bawk.
R-value erawh a hniam hret zawngin a kal tak avangin dinhmun ziaawm lam nia ngaih a ni.
India ram puma R-value an tih hi district thenkhatah chuan a ni lo niin zirtute chuan an sawi a, thenkhatah chuan inkai darh hun hi a tlai thei niin an sawi.