Inthlan nan thla khat pawh a awm tih lo tiha Tun hnaia BJP chhuahsana MLA atanga bâng ta eng emaw zat zinga mi, minister tang lai, Dara Singh Chauhan chuan Pathianni khan Akhilesh Yadav-a kaihhruai Samajwadi Party (SP) a zawm ta.
“Kum 2017 khan BJP khan au hlaah ‘mi tin tana hmasawnna’ aupuiin an bei a, mi tinin kan thlawo a; mahse, hmasawnna chu mi tlem tê chauhvin an chhawr phak si,” a ti.
“Uttar Pradesh politics hi thlakin Akhilesh Yadav hi chief minister-ah kan dah nawn leh ang a. OBC leh Dalit hnamte hmun khatah kan awm a, inthlak thlengna kan thlen ang,” a ti.
BJP thawhpui zinga mi, Apna Dal MLA bâng ta, RK Verma pawhin Pathianni vek khan SP a zawm bawk.
“Dara Singh Chauhan leh RK Verma kan lo lawm a. Tun inthlan hi khawlpui pahnih (Delhi leh Lucknow-a BJP sorkar) nena inbeihna a ni dawn a. Anni chuan ‘keh darhna politics’ an kalpui laiin keini chuan ‘hmasawnna politics’ lamah kan insawrbing dawn a ni,” tiin Yadav chuan a sawi.
Chauhan-a hma hian eptu hruaitu, Yadav-a hian tun hnaia minister bâng ta pahnih chu Inrinni khan a lo seng lut tawh bawk a, Hruaitu dang pawh kan la zel ang,” a ti.
SP hian Chandrashekhar Azad-a chu thawhhopuiah an bia a; mahse, an inrem lo.
OBC hruaitu hriat hlawh, Lok Sabha leh Rajya Sabha MP lo ni tawh, Chauhan-a hi Chief Minister Yogi Adityanath-a sorkarah environment & forests minister a ni a, Nilaini khan a bâng.
Ani leh a hmaa MLA bang tate hi tun inthlana BJP-in tlin nawn leh an tumna kawng a tikhirh zual dawn niin a lang a. BJP hian kum 2017 khan Yadav OBC ni lote vote hmangin Yadav-a hi an hneh a ni.
Tun hnaia Uttar Pradesh-a BJP leh an thawhpui MLA bângte hi Swami Prasad Maurya-a a bân hnua chhuak an ni hlawm a. Minister ve tho, Dharam Singh Saini chuan a tukah chhuahsan ve nghalin Apna Dal MLA telin MLA paruk zet an chhuak tawh bawk.