Mi nawlpuiin Covid-19 an kai leh kai loh hriat nan nimin atang khan Aizawl khawpui hmun lun laiah endik rûnpui ,random testing neih tan niin, a ni khatnaah hri kai mi 19 hmuh chhuah a ni a; vawiinah chhunzawm leh a ni ang.
Aizawl District Task Force on Covid-19 ruahmanna angin AMC huam chhung mipui awm tamna hmun pangaah random testing hi kalpui a ni dawn a. Nimin khan Millennium Centre kawtah neih tan an ni a; mi 136 endik atangin hri kai mi 19 hmuh chhuah a ni.
Sample endik hna hi IDSP hnuaia thawkten an buaipui a, IDSP State Nodal Officer Dr Pachuau Lalmalsawma chuan an beisei aiin inendik duh an tam thu The Zozam Times a hrilh.
Dr Pachuau Lalmalsawma chuan mass testing nen thil dang daih a ni a, task force kaltlanga inhuikhawm ang a nih loh thu sawiin, “Sample endik duh hi an tam vak kan ring lo a; mahse, certificate-te kan pek avang pawh a ni mai thei, kan beisei aiin inendik duh an rawn tam,” a ti.
AMC area-ah random testing hi kalpui phawt a ni a, a tul dan azirin district dangah pawh kalpui tum a nih thu Dr Pachuau Lalmalsawma chuan a sawi.
ADTF on Covid-19-in an ruahman dan chuan vawiinah Zion Street-ah random testing hi kalpui leh a ni ang a, Nilaini ah Bara Bazar, Ninganiah Bus Terminal, Thuampuiah leh Zirtawpniah Falkland Park, Falkland-ah te neih leh a ni ang.