- Mahmuaka Chhakchhuak
Lal neia kum 200 vel lai mizoin hun kan lo hman tawhnaah khan nghet taka dan neih kan nei nualin ziak loh dante thlengin inkaihhruaina lamah dan kan nei a. Mipate chu inti mipa tak zel an niin hmeichhiate chu an dah hnuai thin hle a, nulat tlangvalna kawngah leh nupui pasal neih tawh hnuah pawh mipate chuan mipa taka awm tumna lian tak an nei zel thin a, nulat tlangvalna kawngah phei chuan nula te chan hi a chau thin hle. Mipa tawh phawt chuan nula leh nuthlawi tupawh mai chu a rim thiang a, Pialralah Pawla’n a sai lohna atan mipa puitling tawh phawt chuan nula ngaih an tum thin. Chuvangin nula ngaih chu inelna pakhata an neih hial a ni a, chutih laiin nulate tana tlangval ngaih theih nih chu hmingchhiatna nasa tak a ni thung.
Chutianga dan anga an neih chu nghet taka an vawn lawisi avangin hun hmasa lama mizo mipate reng reng chuan nula ngaih mai bakah tlawmngaihna kawng hrang hrangah inelna nasa tak an nei thin. Chung an inelna lian ber leh ropui ber pakhat chu Thangchhuah hi a ni. Thangchhuah hi chi hniha then a niin; In lama thangchhuah leh ram lama Thangchhuah a awm a. Heng pahnihah hian ram lam Thangchhuah hi ropui zawka ngaih a ni nghe nghe. Ram lama thangchhuah tur chuan Sa bik an kah kim a ngaiin chumi tello chuan 400/500 pawh sa kap mahsela thang an chhuah thei lo. Chung an sa kah tur bikte chu Zukchal, Nghalchang, Savawm, Sai, Sele, Muvanlai, Vapual leh Rulngan te hi an kap vek tur a ni a, Rulngan aiah hian Vahluk pawh an pawm thei bawk. Hengte hi an kah vek mai bakah an ai vek bawk tur a ni a, chutiang a nih loh chuan ram lama Thangchhuah an nei thei ngai lo. Hetianga Thangchhuah an duhna chhan hi Pialrala faisa ringa an awm theihna atan leh Mitthi khaw kalkawnga Pawla’n a sai ngam lohna atan leh khawtlanga mi zahawm an kai theihna atan a ni.
A hmalama kan sawi tak angin mizote chu lal neia hmuntina awm kan niin lal pakhatin khaw pakhat a awp mai bakah thenkhatte chuan khawper awp tel anla nei thin bawk. Chiang taka hriat theih ni chiah lo mahsela heng lalte hi an zavaiin 400 bawr vel nia hriat a ni. Kum 1890-a Sap bawiha kan luh zawh takah khan mizote chuan lal 60 vel kan la neia hriat a ni a, Mizo lal zinga British sorkar laka tlawm hnuhnungte chu Lalburha kha kum 1892 ah a tlawm a, Kairuma pawh kum 1895 ah a tlawmin Ropuiliani pawh 1899 ah hneh a ni. Kum 1901 Chhiarpuiah chuan Mizoram, khatih laia Lushai Hills tih hming pu chhungah British awp loh khua a awm tawh lo. Heng lalte hian an lalna chinah chuan thuneihna tawp an nei theuh a, an thiltih chu tumahin an sawisei thiang ngai lo a ni.
Nimahsela an ngaihtuahna a thui loh vang nge ni inpumkhatna lam an hawi loin mahni mum mumin an mum theuh a, thenawm khuate do an chingin tanrualna lam hawia ke pen an tum meuh ngai lo. Anmahni aia ropui leh thiltithei awm an remti ngai loh avangin khawtlang lamah pawh ‘kan Sai ramchhuahna an ti chereu’ tih vang mai maiin thingpui huana chengte chu an that leh ringawt thin. An ramchhuahna atanga an mithah lu hawn chu ropuinaah an ngaih tlat avangin hmelma ni kher lote pawh an that mai bawk thin a. Kum 1854-a British sorkar record danah chuan kum 17 chhungin mizote chuan phaitual vawi 19 an runin mi 107 lai an that hman a, salah mi 186 an hruai bawk. Chutianga mi an thah fo avang chuan khawthlang sapho thinin a tuar lo a, inrem siamnate neih ni bawk thin mahsela mizo lalte chuan an sim duh chuan loh avangin kum 1889 vel atang chuan Mizoram pum awp bet law law turin an rawn thawk chho ta a.
Chutia Mizoram awp bet tura rawn thawkchhote chu mizo lalte chuan an lo intlawn siak leh a, Bawrhsap laka tlaktlum theihna turin Ar leh Artui an inpeksiak thin. Anni sapte chuan mizo lalte rilru an hriat chian avangin awlsam taka hneh mai theih dan a awm tih an hria a, an inpumkhat loh zia leh an inlungrual lohzia an hriat avangin a mal te tein an hneh a, a tawpah chuan mizorama mizo lal awm zawng zawngte chu an hneh ta vek hial a. Mizo lal zingah Ropuiliani leh Nikualate erawh taninah khungin taninah chuan an hun tawp thlengin an awm a. Hetianga hnam huaisen tak ni chunga kan lungrual lohna hi hmelma tan beih kan nuam zawk tlat si a, chutiang thinlung chu vawiin thleng pawh hian mizote’n kan la nei ni pawhin a hriat.
Sap hoin kum 1890 atanga min awp kha hmangaihna leh khawngaihna avanga min awp an ni hauh loin a hriat a, hnuaichhiahna tinreng nen min awp zawk a ang ber. Chanchintha eng rawn keng luttute chu an ni ngei mai nain chu pawh chu min hnehna hmanraw hmasa mai chauh nia hriat a ni. Missionary rawn lut hmasa berte chu kum 1894 ah Arthington Mission tirhin Aizawlah an rawn thleng a, kum 1903 ah London Baptist Mission sap hoten Lunglei an thleng bawk a. Anni chuan zawi zawiin mizo nunphung reng reng chu an thlak danglamin a hnu lamah phei chuan an thlak danglam vek a ni ber mai. Zirna lamah pawh kawng min sahkuak sakin hmun hrang hrangah School dinin rahbi thar min kaipui a, nimahsela chuti chung chuan High School erawh an din duh hauh chuang lo. Lunglei lamah phei chuan an phallo tluang chhuak zak a, Aizawlah chuan kum 1944 ah Private-in High School din min phalsak hram a nih kha. Mizote’n sakhaw mumal kan neih lohna chu mumal takin min rawn neih tir a. Hei hi ngun taka ngaihtuahin Hindu sakhua rawn lut hmasa zawk nisela khang lai huna mizote khan awlsam takin an pawm mai awm mange a tih theih bawkin a rinawm. Keini ang bawka hnam mawl Chakmaho zingah chuan Buddhist an luh hmasa a, Meitei ho zingah Hindu an lut bawkin chungte chu vawiin thlenga nghet taka an la vawn a ni.
Sapho hian zawi zawia Pathianthu min hrilhna zarah chuan zoram hmun hrang hrangah Pathian thlaraua harhna chu thleng zelin kum 1906 alo thleng meuh chuan Zoram pum huapin ‘Harhna’ alo thleng a, Pathianthu hriatna lamah kan nu leh pate kha an la pachhiat bawk si avangin khurbing, sawn thianghlim tih leh hlim sang tihte chu hriatthiam phak rual loin alo thleng nghal bawk a. Chutih laiin harhtharna chuan khawtlang nunah nasa taka danglamna thlen bawkin nulat tlangvalna kawngah ngei pawh an la urhsunin ‘tupawh hmeichhe ngaihmelh chu uire’ tihte chu changchawiin inrim loh tur, inmelh loh tur an ti a, inngaite chu mualpho taka phuar an lo ni thin. Hla reng reng pawh tihdanglam a niin Chapchar kutte thlenga hnawl vek a ni bawk a, mizoin hnam thila kan lo neih thil tam takte chu hnawlin Sap thil ngaihsanna chu kan thinlungah an tuh zelin vawiin thlengin chu chu kan la chhawm ta zel ni pawhin a hriat.
Incheinaah Sap an kan tum a, tawngkam bungruaah Sap tih dan lak kan tum bawkin ei leh in danah ngei pawh Sap tih dan chu kan lo entawn ta zel bawk hian kan mizo mizona a tiboral zelin nakin lawkah phei chuan kan mizona zawng zawng hi ala hliahkhuh vek lo ang tih pawh sawi har tak a ni ta. Chutih hunah meuh chuan chimrala kan awm pawizia kan la hrechhuak mahna le? Hei vang hi nge ni kan thangtharte reng reng pawh hian pipu nun ze mawi chawisanna lam aiin khawtlang ho tih dan chu an rawn thanlenpui zawk tlat mai bawk a. Anni chauh niloin nu leh pa tam tak te ngei pawh chuan mahni hnam tihdan leh kalphungte ai chuan sap tih dan chu changkang zawkin an hre tlat bawk a, Pathian kan fakna leh chawimawinaahte reng reng pawh sap tih dan chu chunglam malsawm duh zawng niin kan hre tlat bawk nge ni kan uar ta zawk zel chu a nih si hi.