Auto Corner
by Ruata
Rs. Nuai 1.98 man atanga intan tur Yezdi bike thar pathum tlangzarh
Classic Legends chuan hmanlai bike company lar Yezdi brand hnuaiah bike pathum Roadster, Scrambler leh Adventure an tlangzarh ta a. Roadster hi Rs Nuai 1.98 leh 2.06 man inkar tur a ni a. Scrambler hi Rs Nuai 2.05 – Rs 2.11 inkar man a ni a, Adventure hi Rs Nuai 2.10 – 2.19 inkar man a ni thung a ni. Heng a man tarlan te hi ex-showroom, Delhi mil a ni.
Classic Legends in an tlangzarh thar Yezdi bike thar pathum te hian khawl inang 334cc, single-cylinder, DOHC, liquid-cooled engine an nei vek dawn a. Hetihrual hian heng bike te hi bike huang inang lo thah an ni a, a bike pianin a mamawh ang zel turin a khawl tha pekchhuah tur erawh khawih
(tune) danglam vek a ni thung a ni. Heng bakah hian a bike pian a inan loh angin chassis, suspension leh a ke len zawng bakah kawng dang dangah a inang lo vek.
A kentel hrang hrang en chuan bike pathum te hian LED headlight leh tail-lamp bakah fully-digital LCD instrumentation leh dual-channel ABS te an nei theuh a ni.
Yezdi Adventure
Hei hi adventure bike huanga mi a nih angin travel suspension sei tha tak, a hmalamah 200mm leh a hnunglamah 180mm te a nei a. A hnunglam monoshock a hman hi Yezdi bike thar hoa monoshock hmang awmchhun nihtirtu a ni. Adventure bike a nih angin a bike pawh a sang tha a. A ground clearance hi 220mm lai a ni a, Royal Enfield Himalayan nen a inang a, Himalayan ang bawkin a ke pawh hi a hmalamah 21inch, a hnungah 17 inch wire spoke a hmang ve tho.
A design hi Royal Enfield Himalayan design nen a inang em em a. A hma bawr leh a seat bakah thil dang dangah a inang hle a ni. ABS mode pathum road, rain leh off-road te a nei a. Adventure bik hi Yezdi bik thar pathum zinga Bluetooth connectivity leh turn-by-turn navigation nei awmchhun a ni dawn bawk a, hei hi LCD display tha leh dangdai tak a neih hmangin a khawih theih ang a.
A Screen hi a seating leh standing riding position atan pawha hmuh nuam tura her theih vek a ni. Tarlan tak bakah LED indicator, handlebar-mounted USB charger leh thildang dang a nei nual ang.
Yezdi Scrambler
Yezdi bike thar hi a hming ang zel hi an ni mai a. Hei hi scrambler huanga mi a ni veleh thung a. Scrambler bike-a kan hmuh tam ang a hnunglama shock absorber pahnih te kan hmu a, a hnungah hian gas-charged shock absorber pahnih a hmang a. Adventure aiin a suspension hman te pawh a tawi tawh a, a hmalamah 150mm fork leh a hnunga mi kan tarlan 130mm te a hmang. A hma ke hi 19 inch a hmang bawk a, a kentel hrang hrang zingah hian Adventure in a neih ang ABS mode pathum te, LED indicator, handle mounted USB charger tih te a tel a. Sawi tawh angin Bluetooth Connectivity chu a nei dawn lo a ni.
Yezdi Roadster
Yezdi Roadster thung hi chu cruiser huanga mi a ni thung a. A hmalamah 18 inch alloy wheel leh a hnunglamah 17 inch alloy wheel te a nei a. A hmalam suspension pawh hian Yezdi bike hlui ho a pawl viau a. Roadster bik hi chi hnih – dark leh chrome a awm a ni. Dark zawkin a ken tel zingah hian bar end mirror nalh leh dangdai tak a awm a. Chrome-ah hian windscreen lian tha tak leh rear view mirror design pangngai a awm a, hetah pawh hian a ken tel hrang hrang zingah hian bluetooth connectivity a tello leh bawk a ni.
History tawi
India rama Farrokh K Irani and Rustom S Irani in Czech Republic company, Jawa bike an lakluh khan India rama a hming atan Yezdi hman a ni a. Kum 1961-ah Mysore-ah a siamna hmun tur factory din a ni nghe nghe.
Tunhnaiah India rama Classic Legends company chuan brand hming pahnih Jawa leh Yezdi chu tuaitharin neitu nihna an nei thar a. Jawa chu kum 2018-ah bike thar nen an tlangzarh thar tawh a. Tunah hian Yezdi bike thar chu kan hmu veleh ta a ni. India rama mi tam takin thawnthu hlui chang tur bike-a an ngaih hman tawh chu tunah hian a thar tha tak tak kan hmu leh ta a, an brand hming hlu tak pawh a lo vul thar leh ta a ni.