Mi zinga intlar hi a nuam viau thin lo. Mahse, UK-a pa pakhat chu intlar hnehsawh tak niin, sum tam tham tak a hlawhchuak mek.
Freddie Beckitt hian mi hausa leh awm thei zawk intlar peih lem lo te chu an aiah dinsakin, darkar khatah pound 20 (Rs 2,029.37) a hlawh keuh zel.
Intlar fuh chang phei chuan pound 160 (Rs 16,234.96) lai te a ak haw thei a, kum 31 mi hian mi thianghlim te dawhtheihna ang kha a kawl miau mai a, a inltar a, nikhatah darkar 8 thlengte’n vui vai miah lovin a tawlh ve hret hret thin a ni.
Heti anga mi tam takin an tlin loh rei tak intlar hi atan thil harsa leh hrehawm a ni miah lova, a chem kalna zawng tak niin a sawi. London-a piang leh seilian hian intlar hi a thiam thil, a ti ve tlat.
Puipunna leh event lian tham ah te hian rei tak in-tlar a ngai thin a, awm thei deuh- hun nei mang bawk si lo te hian an be pawp mai thin a, a remchang mai zel bawk a.
Beckitt ruaitute hi thalai atanga kum upa lam thlengin an ni hlawm a, intlar tura buai ve tak tak an ni hlawm. Zan reh leh khawvawt te hian a tibuai lem lova, vawite khatmah a la vui ngai bawk hek lo.