Assam police-ten Aitlang Sihpui zauah camp sak an tum avangin helai hmunah hian Mizoram sorkarin a rang lama hma la turin Vairengte khawtlang hruaituten nimin khan Kolasib bawrhsapah an thlenin, helai hmun venga luahtu tur sipai daksak tur leh hma laksak turin an ngen.
Vairengte khawtlang hruaitute hnen atanga The Zozam Times thu dan danin, Assam police-in Vairengte mawng lam Aitlang Sihpui zauah camp sakna tur hmun remchang theite enfiahin nimin lamah survey an nei tih hriat a ni a. Hetianga hmalak tumna thawm hriat a nih veleh Vairengte khawtlang hruaitute chuan, a rang lama hma la turin Kolasib DC-ah an thlen nghal a. Ani bakah hian home minister leh bialtu MLA-te hriattir nghal an ni.
Assam Police in hma thar lak tum thawm hi Vairengtea awm mek police te pawh hriattir nghal an ni a. Vawiin atangin Mizoram police-te pawh patrolling nei tura ruahmanna siam nghal nia thu dawn a ni.
Sihpui zau hi Vairengte miten huan leh lei let eng emaw zat an neihna a ni a. Hetih lai hian, Assam police-te hian camp an rawn siam a nih chuan Mizo enkawl leilet eng emaw zat hi an chân vek dawn niin, Vairengte Joint VC Chairman R Lalfamkima chuan The Zozam Times a hrilh.