Kumthar atan Congress Bhavan hawnna inkhawm nimin khan neih a ni. He huna thusawi Mizoram Pradesh Congress Commmittee (MPCC) President Lalsawta chuan, “He MNF sorkar hian sorkarna a chhunzawm zel chuan Mizoram hi kan duh loh lamah min hnuk lut dawn a, a hlauhawm ka ti,” a ti a; Mizoram dinhmun chhe mek siam tha tur leh, sorkar tha siam turin Congress party a sorkar leh a tul thu a sawi.
“Vawiina ka dinhmun hi ngaihtuahna hmangte chuan a tha lo an ti a. Kei pawhin tha lo ka ti. Mexico leh Colombia ramte angin kan duh lo chung hian mi sualte rorelna ramah kan siam mai ang tih ka hlau,” tiin Lalsawta hian a sawi.
“Mi tha ngawi tlai mai kan nih hi a rem tawh lo a. Mi thate hi ngawi tlat tawh loin, kan ram tichhe tua kan hriat misual tlem zawkte tangrual hi chu huai taka kan do a ngai tawh a ni,” a ti.
Lalsawta hian mi pangngai chin leh ngaihtuahna hmang chin chuan tan tur an neih vek tawh thu leh, MNF sorkar hi a ni lamah a tang nia mipuiin an hriat tlat tawh thu a sawi.
“Hetiang sorkar kan nei hi a vanduaithlak a, a tibuaitu ber hi eng dang a ni lo, pawisa a ni,” a ti a; tuna Mizoram tibuaitu ber chu zep rual lohin pawisa a nih thu te, kum 1993 vela central sorkar minister pakhat London-a a zin hlana a chenna in an check a, pawisa chheprelh nuai 336 an hmuh tum a, ‘ka ta a ni lo’ tih ruai ngai ang deuh chiah kha Mizoramah pawh lemchan a awm tih a sawi.
MNF sorkar hnuaiah Krismas vawi khat chauh hman a nih tawh tur thu sawiin, “Kum 2023-ah kan inthlang dawn a, Krismas vawi khat chauhin min dang tawh. Pawisa nei mihausa te’n mihring leh vote leina’n hman an tum a. Hei hi kan do a ngai a. Congress zingah mi tha leh mihausa kan nei ve tho. Mahse, anni hian mihring lei an tum lo a, an lei dawn bawk hek lo,” a ti a. Khawvela mihring lei theih pahnih chiah an awmin, bawih leh nawhchizuar an nih thu sawiin, “Hetiang leka min hmutu, voter lei theiha min hmutute hi kan ram rorelna sang ber Legislative Assembly-a an awm hi kan rem ti lo; Congress chauh lo pawhin an phal dawn lo,” tia sawiin, mi hausate hi an huat loh thu leh hausakna hmanga vote lei tumtu hi an duh loh thu a sawi bawk.
“He ram hi eng emaw ti zawnga ngaih chuan, kan pi leh pute atanga kan rochun a ni a, dikna chen a awm mai thei. Mahse, kan tu te laka kan la hlan chhawng leh dawn zawk a, chumi enkawl tur chuan vawiina nungdama la awm te hi politics-ah kan lut a, politics a kan awm chhan chu kan lo hausak ber nan leh thuneihna duh vangte a ni lo,” a ti. Sorkar tha a awm chuan Mizoram hi ram nuamah siam theih a nih thu a sawi.
MPCC President hian, sorkarna an siam a nih chuan Pathian duhzawng an tih tur thu leh that loh theih lohna bawm an siam tur thu sawiin, “Israel-ah Mizo tam tak an pem thla a, Israel-a an awm chuan thatchhiat a thiang lo, eiruk a thiang lo, ruih buk buk a thiang hek lo. Mizoramah pawh entawn tur kan nei reng – Biate-ah chuan fai loh theih lohna bawm an siam a, Baktawngah Pu Ziona pawlte’n thatchhiat theih miah lohna bawm an siam bawk. Mizote hian that te, dik te hi kan tlin tih a chiang a ni. Mizote hian sorkar tha siam hi kan tlin a ni,” a ti.
Congress party lo chhuahsan tawhte, party-a la awm ngai lo te leh Mizoram mipui a duh apiangte hmun a awm thu sawiin, “Kawnga zau tak a inhawng e. Min zawm thei kher lo a nih pawhin, in awmna hmun apiangah sorkar tha siam kan tumnaah hian min lo thlawp turin kan sawm che u a ni,” Lalsawta hian a ti a ni.