Mizoram sorkarin Lunglei Tourist Lodge-a RT-PCR khawl bun fel ni tawh mah se, ni tin sample test tur 100 a awm tlin loh avangin hman a la nih rih loh thu high court a hrilh.
RT-PCR Lab for Chhimbial aiawha ding, JC Lalnunsanga hian, Lungleia Makeshift RT-PCR laboratory chu hman theiha bun fel ni tawhin, December 30, 2021-ah pawh a khuh hawnna neih ni tawh mah se tun thlenga hman loha a awm chu Gauhati High Court, Aizawl Bench-a a zualko chungchangah Mizoram sorkar a insawifiah a ni.
January 17, 2022 khan high court-ah Mizoram sorkar chu insawi fiahin, RT-PCR khawl chu hman theiha bun fel a nih tawh thu leh Indian Council of Medical Research (ICMR), New Delhi atanga hman phalna neih fel a nih vek tawh thu court hi a hrilh.
Mizoram sorkar ukil hian ni tin sample test tur 100 a awm tlin loh avangin RT-PCR khawl hi hman a la nih rih loh thu court a hrilh a. Sample test tur 100 aia a tlem a nihin Mizoram chhim lam district pali – Hnahthial, Lunglei, Lawngtlai leh Siaha te tana Truenat Quattro khawl paliten mamawh a phuhruk rih thu sawiin, sample test tur 100 aia tam a awm hunah RT-PCR khawl chu hman theih reng a nih thu a hrilh bawk.
Hetih rual hian, khawvel pumah Covid-19 hri hluar thar leh mek bakah hri thar, Omicron avanga sorkar meuh pawhin SOP khauh taka a kenkawh leh mek laia Mizoram chhim lam district pali atanga sample test tur lakkhawmin 100 pawh a pel lo chu high court chuan mak a tih thu a tar lang a. Heng district palia January 1, 2022 atanga ni tin sample lakkhawm zat dik tak January 25, 2022 hma ngei a thehluh turin Mizoram sorkar hriattir nghal a ni.
Hemi chungchang hi January 25, 2022 khian ngaihtuah nawn leh turin high court chuan thu a dah a ni.