Chhingchhipa Sainik school hotuten Principal Wg.Cdr. Sharul Hameed hovin nimin khan Larsap Hari Babu Kambhampati hmuin state sorkar atanga sum an dawn thin tun hnaia an dawn tak lo thu hrilhin, pui turin an ngen.
Sainik School, Chhingchhip-a principal chuan Sainik School leh a hmuhma chei leh siam that hna chu state sorkar kut a nih thu larsap hrilhin, Mizoram sorkar atanga school cheina tur sum an dawn thin chu tun hnaiah an dawn tak loh thu a hrilh a. State danga Sainik School-te ruala ke pen ve thei tur leh hmunhma tha zawk nei tura theihtawp chhuaha tan lak a hun tawh thu leh state sorkar atanga an sum dawn thin pawh a hma thei anga an mamawh thu hrilhin, hma laksak turin a ngen.
Sainik School hotute chuan Sainik School, Chhingchhipin hun reilote chhungin nasa takin hma a sawn tih larsap an hrilh a. Pawl 6 atanga pawl 10 thleng zirna kalpui mek a nih thu leh zirlai 300 an neih mek thu bakah reilo te hnua pawl 11 leh pawl 12 zirna hawn belh tum a nih thu an hrilh.
Chhingchhipa Sainik School chu India rama Sainik School 33 zingah hmeichhe naupangte luh ve theihna tura bul tanna a nih thu school hotute chuan an sawi a. Sainik School dangah pawh hmeichhe naupang tan admission hawn tan mek a nih thu leh Sainik School, Chhingchhipah tualchhung mite tan seat za-a 67 hauh a nih thu an sawi bawk.
Larsap chuan Sainik School hotute chu India ram hmun danga Sainik School-te aia tha zawk Mizoramin a neih theihna tura tan la zel tura fuihin, an hmasawnnate leh an mamawhahte pawh a remchan dan anga theihtawp a lo chhuahpui tur thu a lo hrilh.