Champhai district-ah kum kalta November 2020 atanga May 2021 chhung khan ram kang vawi 366 a thleng a, heng ram kang zau zawng hi hectare 3396.61 a ni.
Sorkarin a chhinchhiah danin vawi 366 ram kang zinga vawi 363 chu lo/leipui/huan kang vang niin, forest area kang vawi 3 a thleng a. Kum kalta khan ram tikangtu nia puh mi 4 te lakah Champhai PS-ah FIR thehluh a ni a, ram tikangtu mi 2 te chu Rs. 500 ve ve chawitir an ni. Hun bituk chhunga lo hal hman lo khaw pakhat awmin state level sub-committee on fire prevention phalnaa haltir an ni.
India state of forest report (ISFR) 2021-in a tarlan danin Mizoram pum zau zawng atanga chhuta zaa 0.74 chu ngaw dur chhah tha (very dense forest) a awm mek a, ngaw dur chhah tha lutuk lo (moderately dense forest) zaa 26.11 awmin, ram hring chin an tih mai forest cover zau zawng zaa 84.53 a ni.
Undivided Champhai district-ah ngaw dur chhah tha Sq. Km 55.36; ngaw dur chhah tha lutuk lo Sq. Km 942.9 leh ram hring pangngai open forest Sq. Km 1375.63 a zau awm anga chhut a ni a. Undivided Champhai district bika ram hring zau zawng forest cover area chin chu ram zau zawng atanga chhuta zaa 74.53 a ni.
Kum hnih kalta chhunga Mizoram puma ram hring (forest cover) hloh zat Sq. km 185.51 a ni a; heng zinga Sq. Km 113.90 a zau chu Undivided Chanmphai district chhunga thleng a ni bawk.
Champhai district fire prevention committee chu nimin khan an chairman, district bawrhsap Maria CT. Zuali, hovin an thukhawm a, kumin February ni 7-12 chhunga kangmei ven hapta hman dan tur leh kumin thal chhova Champhai district-a kangmei a chhuahlohna tura hmalak dan tur te an sawiho bawk a ni.