MZP hruaitute leh college students’ union hruaitu ten nimin khan chief minister Zoramthanga hmuin, college class off-line a kaltir tura ngennate, Mizoram sorkar hnuaia college students’ study fund tihpun chungchang, higher & technical director chungchang, ZOFEST 2022 chungchang, Vathuampuia RD block dah tura ngenna te leh ramria kuthnathawktute harsatna chungchangte an thlen.
Chief minister hmutu zirlai hruaitute chuan zirlaite hmakhua tur ngaihtuahin online ringawta class an kal chu tha lo an tih thu chief minister chu hrilhin, final semester tal chu offline-a class kaltir turin an ngen a. Mizoram sorkar hnuaia college students’ study fund pawh beitham an tih thu hrilhin, tipung turin an ngen a. Higher & technical education department director atan Mizo ngei dah turin an ngen bawk.
Rural development block (RD block) siam belh turah Vathuampui-ah RD block dah turin zirlai hruaitute chuan chief minister chu an ngen a. Ramria kuthnathawktute harsatna chungchang leh Thangram Indigenious People’s Movement chungchang te chief minister hnenah chuan thlenin, chief minister pawhin an thu thlente chu a ngaihpawimawh thu leh tihhlawhtlin dan ngaihtuah a lo intiam thu zirlai hruaitute chuan an sawi bawk a ni.