Khawvel hmasawnnaa thiamna changkang zelah U.S. C-Band 5G thar kalpui a ni chuan Airline tam takte tan harsatna a thlen chho turah ngaiin, fimkhur turin tunlai hian inchah runpui a thleng.
5G service hian thlawhna hmanraw pawimawh, heng- radio altimeter te a tibuai thui thei tura ngaih a ni a, thlawhna tlankawng leh a tum huna a ke inkara san zawng tarlanna niin, a buai mai hlauhthawnna a tam.
Tarlan tawh angin, 5G hi fifth generation cellular network niin, tuna hman mek 4G aiin a let 100 velzetin a chak. European Union (EU) chuan mid-range 5G frequency te hi 3.4-3.08GHz range-ah a dah a, tuna US hman C-Band (3.7-4.2Ghz) aia frequency hniam zawk a ni.
Nikum khan Federal Communications Comission (FCC) chuan $ billion 80 man tur lilam nah C-Band spectrum zawng zawng tih mai tur chu AT&T leh Verizon kutah a pe.
An innghat tawp si a le
Pilot te tan tlankawng (runway) hmuh fiah theih a pawi-mawh a, chhumzing emaw khaw hmuh fiah loh tak karah lei atanga thlawhna sang zawng hi hriat tul leh pawi-mawh lutuk a ni thin a. A chunga sawi tawh ang khian radio altimeter emaw Rad Alt hian data a pekchhuak thei a, pilot te tan an innghahna a ni deuh tawp mai.
U.S. Federal Aviation Administration (FAA) hian automated safety system tam tak hi Rad Alt data-a innghah an nih deuh vek avangin a nihna dik tak tarlanna a nghawng theih an hlau hle.
Hetah hian leilung awm dan te, thlawhna insut palh theihna te, flight surface control, autothrottle leh thrust reverse te thlengin he system hian a huam pha vek. Heng te hi a fiah tawk lova, accuracy-ah chian lohna a awm chuan a hlauhawm pha tawh. Khaw hmuh fiah loh leh hniam taka thlawhna thlawhna kawngah te tanpuitu te an ni si a!
Thlabar nasa mai!
Thawhlehni (January 19) khan U.S. airport hnaihah te FCC-in C-band frequency te a tihnun vangin 5G himna chungchanga ngaih tha lo airline thahnem takte chuan flight an cancel hlawm. British Airways Boeing 777 te phei chu ‘risk’ a sang hle a ngaih a ni a; hengte vang hian Heathrow atanga Boston, Chicago, Los Angeles, New York leh San Francisco flight chu tihtawp lailawk vek a ni.
Dubai-a inkhuar Emirates pawhin nilaini vek han U.S. airport pakua pan tur flight te chu a cancel vek a; Airline langsar- Air India, Japan-a inkhuar ANA, Japan Airlines leh Korean Air te pawhin thlawhchhuah an \hulh vek.