Mizoram sorkarin zu khapna dan, Mizoram Liquor Prohibition (MLP) Rules zirchiangtu tur committee a din, nimina thukhawm chuan grape chingtuten MLP Rules-ah an thar chhuah atanga wine siam phalna telh an rawtna chu a hnawl.
MLP Rules Drafting Study Committee hi an chairman, Deputy Chief Minister Tawnluia hoin an thukhawm a, an thutkhawm hmasaa thu an dah, MLP Rules-ah wine siam phalna an telh leh telh loh tur an sawi ho a, wine siam chu khawtlang leh kohhran inrelbawlna ennin a remchang lo nia an hriat avangin MLP Rules-ah hian telh loh nise tiin an rel ta a ni.
Thudawn danin, Mizoram Grape Growers Association-in Mizoram sorkarah grape wine siam leh zawrh phalna pe turin an lo ngen tawh a, MLP Rules-ah hian wine siam phalna hi telh a rem leh rem loh chu MLP Rules Drafting Study Committee hian a zirchiang a, an thutkhawm hmasa khan wine siamchhuahah hian alcohol 5% vela sanga siam chhuah nise tiin lo sawiho tawh mah se nimina an sawiho leh hnuah wine siam phalna chu telh an rem ti leh ta lo a ni.
Nimina an thutkhawmnaah Excise Minister Dr K Beichhua, IPR Minister Lalruatkima, Excise Dept hotute, Mizoram Kohhran Hruaitute Committee MKHC aiawh te, Central YMA aiawh te, Mizoram Upa Pawl MUP aiawh te an tel a ni.
Zu zawrh khapna dan, Mizoram (Liquor Prohibition) Act hi March 20, 2019 khan assembly house-ah pawm a ni a, MLP rules chu December 19, 2019 khan notification hmanga tichhuah ni mah se sut leh a ni a, cabinet-in a ngaihtuah leh hmaa lo zirchiang tur committee din a ni ta a ni.