India sorkar chuan tun hnaia tlangkang leh tsunami tuar, Tonga ram tanpui nan US $ 2,00,000 a pe dawn.
Heng sum hi puihna, an intuam hlawm nan leh in indin thar lehna atana tih a ni tih Ministry of External Affairs (MEA) chuan Thawhlehni khan a puang.
“Thian tha leh Forum for India-Pacific Islands Cooperation (FIPIC)-a kan thawhpui hi kan inthian thatna lantir nan India sorkar chuan US $ 2,00,000 a pe dawn,” tiin MEA hian thuchhuah a siam.
India hian Tonga sorkar leh ram mipuite chu chhiatna nasa tak an tawrhah a tawrhpui tak zet tih a sawi bawk.
Tar lan tawh thin angin Tonga ram hi January 15, 2022 khan tuipui chhunga tlangkangin a siam tsunami na takin a nuai a. An ram mipui tam takin tuarin an in leh lo a chhe nasa hle bawk.
“India hi Tonga-in khuarel chhiatna a tawrh mekah hian kum 2018-a Cyclone Gita a tawrh lai ang bawk khan a tawrhpui a. Chhiat rupna thleng thei tur ven leh a thlena lo hmachhawn hi Prime Minister Narendra Modi-a’n November, 2019-a a puan, Indo-Pacific Oceans’ Initiative (IPOI) hnuaiah India hian a ngai pawimawh em em a ni,” tiin MEA thuchhuahah hian tar lan a ni bawk.